नाशिक - दिंडोरी तालुक्यातील भनवड यात्रेत युवकांमध्ये झालेल्या किरकोळ वादातून एका युवकाचा खून झाला आहे. वणी पोलिसांनी एक संशयित आरोपीला ताब्यात घेतले आहे. काशीनाथ मुरलीधर शेवरे (वय-28) असे हत्या झालेल्या युवकाचे नाव आहे.
हेही वाचा - कल्याणमध्ये मित्राच्या भांडणामध्ये मध्यस्थी करण्यास गेलेल्या तरुणाचा खून
वणी पोलिसांकडून मिळालेल्या माहितीनुसार भनवड येथील यात्रेत काशिनाथ मुरलीधर शेवरे व तुषार नामदेव गांगोडे (वय-20) यांच्यात किरकोळ वाद झाला होता. हा वाद थेट हाणमारीपर्यंत गेला. यात काशीनाथला जबर मार लागल्याने तो जागेवरच कोसळला. तेथील ग्रामस्थांनी त्यास तातडीने दिंडोरी येथे उपचारासाठी नेले. मात्र, डॉक्टरांनी त्यास मृत म्हणून घोषित केले. त्यानंतर वणी पोलिसांना घटनेची माहिती मिळताच घटनास्थळी धाव घेत एक संशयित आरोपी तुषार नामदेव गांगोडे (राहणार- ननाशी) यास ताब्यात घेतले असून अधिक तपास सुरू केला आहे. तसेच पोलीस उपअधीक्षक सदाशिव वाघमारे,पोलीस निरीक्षक प्रवीण पाडवी यांनी घटनास्थळी भेट देत अधिक तपास सुरू केला आहे भनवड येथे अतिरिक्त पोलीस बंदोबस्तही वाढविण्यात आला आहे.
हेही वाचा - पुण्याच्या विश्रांतवाडी परिसरात किरकोळ कारणावरून झालेल्या भांडणातून तरुणाचा खून
