नाशिकच्या येवला तालुक्यात ९३ लाखांचा मद्यसाठा जप्त; दोघे ताब्यात

येवला तालुक्यात राज्य उत्पादन शुल्क विभागाने केलेल्या कारवाईत 93 लाख रुपयांहून अधिक रुपयांचा अवैध मद्यसाठा जप्त करण्यात आला आहे. याप्रकरणी दोन संशयितांना ताब्यात घेण्यात आले आहे.

नाशिक - जिल्ह्यात अवैद्य मद्य वाहतूक आणि विक्रीचे प्रमाण वाढल्याच्या चर्चा आहेत. त्यातच पुन्हा एकदा येवला तालुक्यात राज्य उत्पादन शुल्क विभागाने केलेल्या कारवाईत 93 लाख रुपयांहून अधिक रुपयांचा अवैध मद्यसाठा जप्त करण्यात आला आहे.

गुरुवारी रात्री येवला तालुक्यातील पिंपळगाव जलाल याठिकाणी पोलिसांना मिळालेल्या गुप्त माहितीच्या आधारे एका वाहनातून महाराष्ट्रात प्रतिबंधित असलेल्या बनावट मद्यसाठ्याची वाहतूक केली जात असल्याची माहिती राज्य उत्पादन शुल्क विभागाच्या भरारी पथकाला मिळाली. एक ट्रक नगरमार्गे मनमाडकडे संशयास्पदरित्या जात असल्याचे आढळून आले. दरम्यान पथकाने वाहन चालकाची विचारपूस करून वाहनाची झडती घेतली. त्यात विदेशी बनावटीचा महाराष्ट्रात प्रतिबंधित असलेला 93 लाख 63 हजार रुपयांचा अवैध मद्यसाठा आढळून आला. याप्रकरणी दोन संशयितांना ताब्यात घेण्यात आले आहे, अशी माहिती अर्जुन ओहोळ विभागीय उपायुक्त राज्य उत्पादन शुल्क विभाग यांनी दिली आहे.

तब्बल 1100 बॉक्स मद्यसाठा जप्त - याप्रकरणी 1100 बॉक्स मद्यसाठा जप्त करण्यात आला असून संजय साहेबराव पाटील आणि काशिनाथ बुधा पाटील या दोन संशयितांना पोलिसांनी ताब्यात घेतले आहे. दरम्यान, यात आणखी गुन्हे उघडकीस येण्याची शक्यता पोलिसांच्यावतीने वर्तविण्यात आली आहे. दोन्ही संशयितांविरोधात गुन्हा दाखल करण्यात आला आहे.

हेही वाचा - मराठा विकास प्राधिकरण स्थापनेच्या विरोधात कर्नाटक बंद; कन्नड संघटनांचा पुढाकार