नंदुरबार : शहरातील महाराष्ट्र व्यायाम शाळा परिसरात मध्यरात्री साडेअकराच्या सुमारास दोन गटात तुफान दगडफेक झाल्याची घटना घडली आहे. या दंगलीत काचेच्या बाटल्यांचा मोठ्या प्रमाणात वापर करण्यात आला. रात्री पोलिसांनी अश्रूधुराचा वापर केला असून जुन्या वादातून दोन गटात ही तुफान दगडफेक झाली असल्याचे सांगण्यात येत आहे. दरम्यान
दंगलीत 2 अधिकाऱ्यांसह 2 ते 3 पोलीस कर्मचारी जखमी झाले. याप्रकरणी सुमारे पंधरा ते वीस संशयतांना अटक करण्यात आली आहे.
मध्यरात्री झाला दगडफेकीचा तांडव : मध्यरात्री सुमारे साडेअकरा वाजेच्या सुमारास अचानक दगडफेक सुरू झाली. या दरम्यान परिसरात बंदोबस्तात असलेले पोलीस कर्मचारी जखमी झाले आहेत. त्यांनी तात्काळ वरिष्ठांना याबाबत माहिती दिली. त्यादरम्यान जमावाकडून तुफान दगडफेक करण्यात आली. मात्र या दगडफेकीचे कारण अद्यापही स्पष्ट होऊ शकले नाही आहे. त्यामुळे या दंगलीचे कारण गुलदस्त्यातच आहे.
अधिकारी व कर्मचारी जखमी : जुन्या वादातून दोन गटात तुफान दगडफेक झाली. मोटर सायकलची जाळपोळ करण्यात आली आहे. तर दोन पोलीस कर्मचारी जखमी झाले आहेत. यावेळी जमावाला पांगविण्यासाठी पोलिसांनी अश्रू धुराच्या नळकांड्या फोडण्यात आल्याची प्राथमिक माहिती मिळाली आहे. याबाबत रात्री उशिरापर्यंत पोलिसांकडून धरपकड सुरू होती. जवळपास 15 ते 20 संशयतांना ताब्यात घेण्यात आले आहे. सध्या परिसरात पूर्ण शांतता आहे. शहरातील संवेदनशील भागात मोठा पोलीस बंदोबस्त लावण्यात आला आहे.
वरिष्ठांनी दिली घटनास्थळी भेट : याप्रसंगी पोलीस अधीक्षक पी. आर. पाटील, अप्पर पोलीस अधीक्षक निलेश तांबे यांनी परिसरात जाऊन पाहणी केली. उपविभागीय पोलीस अधिकारी सचिन हिरे स्थानिक गुन्हे अन्वेषण शाखेचे पोलीस निरीक्षक किरणकुमार खेडकर, शहर पोलीस निरीक्षक रवींद्र कळमकर यांच्यासह पोलिस अधिकारी व कर्मचारी घटनास्थळी तळ ठोकून आहेत. तर मध्यरात्रीच्या सुमारास घडलेल्या दगडफेकीच्या घटनेची सोशल मीडिया अथवा इतर माध्यमातून अफवा पसरवू नये. त्याचप्रमाणे घटनेतील आरोपींबाबत काही माहिती असल्यास पोलीस प्रशासनाची संपर्क साधावा असे आवाहन पोलीस अधीक्षक पी आर पाटील यांनी नागरिकांना केले आहे.
अनेक वर्षानंतर नंदुरबारात अशांतता: नंदुरबार शहर हे काही वर्षांपूर्वी अतिसंवेदनशील शहर म्हणून ओळख होती. मात्र गेल्या काही वर्षांपासून नंदुरबार शहरात शांतता निर्माण झाली होती. गेल्या सात-आठ वर्षांपासून नंदुरबार शहरात कुठलीही जातीय तेढ निर्माण होईल अशी घटना घडली नव्हती.
हेही वाचा: Nandurbar News वीज पुरवठा सुरळीत करताना शॉक लागून लाईनमनचा मृत्यू नातेवाईकांची चौकशी मागणी
