नंदुरबार - दक्षिण काशी म्हणून प्रसिध्द असलेल्या प्रकाशा तीर्थक्षेत्रावरील त्रिवेणी संगमावर महापुराण सोहळ्याचे आयोजन करण्यात आले. या दिमाखदार सोहळ्यात सूर्यकन्या तापीमाईला सुमारे अर्धा किमी लांबीचे महावस्त्र राष्ट्रसंत कनकेश्‍वरी देवी यांच्या हस्ते अर्पण करण्यात आले. या ऐतिहासिक सोहळ्याचे शेकडो जण साक्षीदार बनले. दक्षिण काशी म्हणून प्रसिध्द असलेल्या प्रकाशा तीर्थक्षेत्रावरील संगमेश्‍वर, केदारेश्‍वर, सिद्धेश्‍वर, महादेव या मंदिरांची सर्वदूर ख्याती आहे.
प्रकाशा येथे शनिवारपासून शिव महापुराण कथेला प्रारंभ झाला आहे. शिवपुराण कथेचे निरुपण करणार्‍या राष्ट्रसंत कनकेश्‍वरी देवी यांची तापीमाईला महावस्त्र अर्पण करण्याची इच्छा होती. त्यानुसार गंगाखेड येथून 550 मीटर अर्थात अर्ध्या किमीचे अखंड गुलाबी रंगाचे महावस्त्र मागविण्यात आले. गोमाई, फुलंदा, तापी नदीच्या त्रिवेणी संगमावर प्रथमच तापीमाईला विधिवत पूजन करून दिमाखदार सोहळ्यात राष्ट्रसंत कनकेश्‍वरी देवी यांच्या हस्ते महावस्त्र अर्पण करण्यात आले. यावेळी शेकडो भाविक या सोहळ्याचे साक्षीदार बनले. महावस्त्र अर्पण करताना परिसरात जल्लोषमय व भक्तीमय वातावरण निर्माण झाले होते.
हेही वाचा - तीन दिवसीय प्रकल्पस्तरीय क्रीडा स्पर्धांचे उद्घाटन, 975 विद्यार्थ्यांचा सहभाग
तापीमाईला महावस्त्र अर्पण होणार यासाठी सकाळपासूनच संगमेश्‍वर महादेव मंदिराजवळच्या तापी घाटावर भाविकांनी गर्दी केली होती. ५ नावाड्यांच्या मदतीने एका काठापासून दुसर्‍या काठापर्यंत अखंड तापीमाईला महावस्त्र अर्पण करण्यात आले. सकाळी राष्ट्रसंत कनकेश्‍वरी देवी यांच्या हस्ते संगमेश्‍वर महादेवावर जलाभिषेक करून विधीवत पूजा करण्यात आली. त्यानंतर तापीच्या पात्रात जलपूजन करण्यात येवून दिमाखदार ऐतिहासिक सोहळ्यात महावस्त्र तापी पात्रात अर्पण करण्यात आले.
हेही वाचा - सीसीसीआयच्या मापदंडामुळे कापसाला हमीभाव नाकारला, कापसाची खरेदी-विक्री बंद
16 नोव्हेंबरपासून शिव महापुराण कथेला प्रारंभ झाला असून या कथेची सांगता 23 नोव्हेंबरला होणार आहे. महावस्त्र अर्पण करताना भाविकांनी संगमेश्‍वर, केदारेश्‍वर, सिद्धेश्‍वर महादेवाचा जयघोष केला. यावेळी शेकडोंच्या संख्येने भाविक उपस्थित होते.
हेही वाचा - विविध मागण्यांसाठी प्रहारचा जिल्हाधिकारी कार्यालयासमोर ठिय्या; आंदोलक पोलिसांच्या ताब्यात
