नंदुरबार - तालुक्यात मोठ्या प्रमाणात भाजीपाला उत्पादक शेतकरी असून मोठ्या प्रमाणावर भाजीपाला पिकविला जातो. हा भाजीपाला गुजरात आणि मध्यप्रदेशमधील मोठ्या शहरांमध्ये पाठविला जातो. मात्र, बाजारपेठ बंद असल्याने शेतकऱ्यांनी नागरिकांना मोफतमध्ये शेतातून भाजीपाला घेऊन जाण्यास सांगितले. मात्र त्याला प्रतिसाद मिळाला नाही म्हणून शेतकऱ्याने तीन एकर क्षेत्रावरील वांग्याच्या पिकात गुरे चारण्यास सोडून दिले आहेत.
नंदुरबार शहरातील माळीवाडा भागात राहणारे शेतकरी विजय माळी यांनी १ लाख रुपये खर्च करून वांग्याची लागवड केली. आता वांगे निघण्यास सुरुवात झाली आणि त्याचवेळी लॉकडाऊन आणि संचारबंदीमुळे नंदुरबार कृषी उत्पन्न बाजार समिती बंद राहिली. यामुळे, वांगे खरेदी करण्यास व्यापारी तयार नव्हते. त्यामुळे त्यांनी संपूर्ण परिसरातील नागरिकांना वांगे मोफत घेऊन जाण्यास सांगितले. मात्र त्याला प्रतिसाद मिळाला नाही, म्हणून त्यांनी आपल्या तीन एकर क्षेत्रावरील वांग्याच्या पिकात गुरे सोडून दिली आहेत.
उन्हाळ्यात भाजीपाला मार्केटमध्ये मोठ्या प्रमाणात तेजी आसते त्यामुळे शेतकऱ्यांचा भाजीपाला लागवडीकडे कल आसतो. मात्र या वर्षी उन्हाळी भाजीपाला निघण्यास सुरुवात झाली आणि कोरोनामुळे लॉकडाऊन आणि संचारबंदीमुळे नंदुरबार कृषी उत्पन्न बाजार समिती बंद आहेत. तर दुसरीकडे मोठ्या शहरात घेऊन जाण्यासाठी वाहनाची व्यवस्था नसल्याने या शेतकऱ्याने आपल्या उभ्या पिकात गुरे सोडली आहेत.
हे शेतकरी प्रातिनिधिक उदाहरण आहेत. असे शेकडो शेतकरी नंदुरबार जिल्ह्यात असून त्यांनी बाजार पेठ उपलब्ध नसल्याने उभ्या पिकात गुरे सोडली आहेत. कोरोनामुळे शेतकऱ्यांना सर्वात मोठा फटका बसला आहे. असे नंदुरबार जिल्ह्यातील भाजीपाला उत्पादक शेतक-यांनी म्हटले आहे.
