नांदेड- उत्तर प्रदेशातील उन्नाव येथील पीडित बलिकेला त्वरित न्याय देण्यात यावा, दोषींवर कठोर कारवाई करण्यात यावी या मागणीसाठी युवक काँग्रेसच्यावतीने रविवारी विद्यार्थ्यांची स्वाक्षरी मोहीम राबविण्यात आली. या मोहिमेची सुरुवात आमदार डी.पी. सावंत यांनी स्वाक्षरी करून केली.
उत्तर प्रदेशातील उन्नाव येथे सत्ताधारी भाजपच्या आमदार कुलदीप सेंगर याने अल्पवयीन बलिकेवर अत्याचार केला होता. या प्रकरणाची कुठे वाच्यता केल्यास पीडित मुलीस व तिच्या कुटुंबातील सदस्यांना जीवे मारण्याची धमकीही दिली होती. मात्र, हा अत्याचार सहन न झालेल्या पीडितेने पोलिसात तक्रार दाखल केली. या प्रकरणी आ. कुलदीप सेंगर याच्यावर गुन्हे दाखल करण्यात आल्यानंतर त्याला अटक झाली. परंतु आ. कुलदीप सेंगरच्या इशाऱ्यावरून पीडितेच्या नातेवकांवर दबाव आणला जात आहे. साक्षीदारांना जिवंत मारले जात आहे. याच प्रकारे पीडितेच्या वडीलाचा अपघात घडवून आणण्यात आला आहे. या अपघातात पीडितेच्या वडिलांचा मृत्यू झाला आहे.
आरोपी सत्ताधारी भाजपचा आमदार असल्यामुळे योगी सरकार आरोपीची पाठराखण करीत आहे. पीडित बलिकेच्या व तिच्या नातेवाईकांच्या जीवितास आरोपीकडून धोका निर्माण झाला आहे. अशा परिस्थितीत पीडितेला त्वरित न्याय देण्यात यावा तसेच आरोपीला कठोरात कठोर शिक्षा झाली पाहिजे, यासाठी रविवारी युवक काँग्रेस नांदेडच्यावतीने यशवंत महाविद्यालयासमोर समोर विद्यार्थ्यांची स्वाक्षरी मोहीम राबविण्यात आली.
यावेळी युवक काँग्रेसचे शहर जिल्हाध्यक्ष विठ्ठल पावडे, दक्षिण विधानसभा अध्यक्ष अब्दुल गफार, उत्तर विधानसभा अध्यक्ष सत्यजित भोसले, नांदेड प्रभारी अभय देशमुख, शहर जिल्हा उपाध्यक्ष संदीप सोनकांबळे, नितीन झरीकर, जेसिका शिंदे, एन. एस. यु. आय.चे जिल्हाध्यक्ष शंकर शिंदे, सरचिटणीस गोपी मुदिराज आदी पदाधिकारी उपस्थित होते. यावेळी हजारो विद्यार्थ्यांनी स्वाक्षरी करून पीडितेला न्याय देण्याची मागणी केली आहे.
