नांदेड - राज्यातील चार पालिकेतील पोटनिवडणुकीची घोषणा झाली असून लगेच आचारसंहिता लागू झाली आहे. यात नांदेडमधील प्रभाग क्रमांक 13 ड चा समावेश आहे. ही पोटनिवडणूक 6 फेब्रुवारी रोजी होणार आहे. 14 जानेवारीपासून उमेदवारी अर्ज प्रकिया सुरु होणार आहे.
विधानसभा निवडणुकीच्या काळात काँग्रेसचे नगरसेवक साबेर चाऊस यांनी नगरसेवक पदाचा राजीनामा देऊन एमआयएममध्ये प्रवेश केला आणि एमआयएमकडून नांदेड दक्षिण विधानसभा निवडणूकही लढविली. साबेर यांना 27 हजार मते मिळाली. साबेर यांच्या राजीनाम्यामुळे नांदेड मनपाच्या प्रभाग क्रमांक 13ड ची जागा रिक्त झाली होती. या जागेवर पोटनिवडणूक केव्हा होणार याकडे लक्ष लागले असताना राज्यातील नांदेड प्रभाग क्रमांक 13 ड, जळगावमधील प्रभाग क्रमांक 9 अ, परभणीतील प्रभाग क्रमांक 14 अ व नगरमधील प्रभाग क्रमांक 6 अ मधील पोटनिवडणुकीची प्रक्रिया राज्य निवडणूक विभागाने सुरु केली आहे.
या चारही प्रभागात लगेच आचारसंहिता लागू झाली असून निवडणूक निकालापर्यंत ती लागू राहील. या प्रभागातील मतदारांवर विपरित प्रभाव टाकणारी कोणतीही कृती किंवा घोषणा कोणत्याही मंत्री, खासदार, आमदार, नगरसेवक, मनपा पदाधिकारी यांनी करु नयेत. या पोटनिवडणुकीच्या अनुषंगाने संबंधित प्रभागातील मतदार यादी तयार करण्याची प्रक्रियाही सुरु झाली आहे.
ही निवडणूक 6 फेब्रुवारी रोजी होणार आहे. 14 ते 21 जानेवारीदरम्यान सकाळी 11 ते दुपारी 3 पर्यंत उमेदवारी अर्ज स्वीकारले जाणार आहेत. 19 रोजी सुटी असल्याने अर्ज स्वीकारला जाणार नाही. 22 जानेवारी रोजी अर्जाची छाननी होईल. 24 रोजी दुपारी 3 पर्यंत अर्ज मागे घेता येतील. 25 रोजी सकाळी 11 निवडणूक चिन्हाचे वाटप होणार आहे. 6 फेब्रुवारी रोजी सकाळी 7.30 ते सायंकाळी 5.30 मतदान होईल तर 7 फेब्रुवारी रोजी सकाळी 10 पासून मतमोजणी सुरु होईल.
हेही वाचा - 'तमाशामध्ये प्रेक्षकांची हुल्लडबाजी, त्यातच पोलीसही पैसे मागतात; मग लोककला जिवंत कशी राहणार?'
साबेर चाऊस व फेरोज लाला एमआयएमकडून पुन्हा मैदानात उतरणार असल्याचे कळत आहे. त्यामुळे काँग्रेससाठी ही जागा आव्हानात्मक ठरु शकते. दरम्यान, सध्या महापालिका सभागृहात काँग्रेसचे बहुमत आहे. 81 पैकी 73 जागा काँग्रेसकडे असून एक अपक्ष, एक सेना, सहा भाजप असे पक्षीय बलाबल आहे. सेनेचे एकमेव नगरसेवक बालाजी कल्याणकर हे आमदार झाले आहेत. परंतु अजून त्यांनी आपल्या पदाचा राजीनामा दिलेला नाही. त्यांच्या राजीनाम्यानंतरच या वॉर्डातील त्यांच्या जागेसाठीची पोटनिवडणूक जाहीर होतील.
हेही वाचा - जिल्ह्याच्या विकासासाठी एकत्रित काम करा; नांदेड दौऱ्यादरम्यान कॅबिनेट मंत्र्यांचे आवाहन
