नांदेड - लोकसभा निवडणुकीत भाजपच्या तिकिटावर निवडून येऊन खासदार प्रताप पाटील-चिखलीकर यांनी ऐतिहासिक विजय घडविला होता. लोहा-कंधार खा.प्रताप पाटील चिखलीकर यांचा बालेकिल्ला आहे. त्यांच्या होमपीचवरच त्यांना धक्का बसला आहे. शिवसेनेचे मुक्तेश्वर धोंडगे यांना पक्षाने बी-फार्म देऊन शिवसेनेने आपला हक्क कायम ठेवला आहे. खा.चिखलीकरांच्या हक्काच्या मतदारसंघातच वांदे होऊन बसल्यामुळे स्वतःच्या घरचीच वाट बिकट होऊन बसली आहे.
हेही वाचा - सातारा लोकसभेचा आखाडा रंगणार.. उदयनराजेंच्या विरोधात राष्ट्रवादीकडून श्रीनिवास पाटील
गत निवडणुकीत लोहा-कंधार विधानसभा मतदारसंघातून शिवसेनेच्या तिकिटावर प्रताप पाटील-चिखलीकर हे भाजपच्या मुक्तेश्वर धोंडगे यांचा पराभव करून मोठ्या फरकाने विजयी झाले होते. त्यानंतर त्यांचे शिवसेनेसोबत बिनसल्यामुळे त्यांनी नांदेड महानगरपालिकेच्या निवडणुकीदरम्यान भाजपमध्ये प्रवेश केला. नांदेड लोकसभा निवडणुकीत त्यांच्यावर भाजपने उमेदवारी देऊन मोठी जबाबदारी टाकली. त्यात माजी मुख्यमंत्री अशोक चव्हाण यांचा पराभव करून त्यांनी ऐतिहासिक विजय प्राप्त करत यशस्वीही झाले. त्यानंतर त्यांच्यातील आत्मविश्वास वाढला. कोणत्याही परिस्थितीत लोहा-कंधार मतदारसंघ हा आता भाजपच्या वाट्याला येईल, असा विश्वास होता. मात्र, हा आत्मविश्वास त्यांना नडला.
हेही वाचा - विधानसभा निवडणूक 2019 : सहदेव बेटकरांनी सोडले 'शिवबंधन', राष्ट्र्वादीकडून लढवणार निवडणूक
दरम्यान, त्यांच्या घरातच गृहकलह सुरू झाला. त्यांचे मेहुणे माजी सनदी अधिकारी श्यामसुंदर शिंदे हे तयारीला लागले होते. कुठल्याही परिस्थितीत मी निवडणूक लढविणार, असे त्यांनी जाहीर केले. खा. चिखलीकर यांचे पुत्र प्रविण पाटील दुसरीकडे तयारीला लागले होते. सोशल मीडियावरील एक व्हायरल झालेल्या ऑडिओ क्लिपवरून त्यांच्या कुटुंबायातील गृहकलह उघड झाल्याचे दिसून आले. या सर्व प्रकारामुळे त्यांच्या समर्थकांमध्ये चल-बिचल सुरू आहे. राजकारणात नेहमीच संघर्ष वाट्याला असलेले खा.चिखलीकर हे पुन्हा बंडखोरी करतात की काही राजकीय बळ वापरून भाजपला हा मतदारसंघ सोडून आणतात, याकडे जिल्ह्याचे लक्ष्य लागले आहे.
हेही वाचा - भाजपने राणेंना गंडवले का? आता काय करणार राणे?
दरम्यान, मातोश्रीवर उमेदवारांना बी-फॉर्म वाटणे सोमवारीही सुरूच होते. हदगावचे विद्यमान आ. नागेश पाटील आष्टीकर, मुखेडचे आ. सुभाष साबणे, तसेच हिंगोलीचे खा. हेमंत पाटील यांच्या पत्नी राजश्री पाटील (नांदेड-दक्षिण) या तीन उमेदवारांना पक्षप्रमुख उद्धव ठाकरे यांच्याहस्ते अधिकृत उमेदवारीचे बी-फॉर्म देण्यात आले.
