नांदेड - जिल्ह्यातील अर्धापूर तालुक्यात व परिसरात सोमवारी रात्री १२:३० वाजताच्या सुमारास अचानक विजांच्या कडकडाटासह जोरदार पाऊस पडला. वादळी वाऱ्यासह पडलेल्या पावसामुळे अनेकांच्या घरावरील पत्रे उडून गेले आहेत. तर परिसरातील केळी, गहू, हळद, ज्वारी व पपई पिकांचे मोठ्या प्रमाणावार नुकसान झाले आहे.
अर्धापूर परिसरातील शेणी, लहान, लोणी, चाभरा, कारवाडी, निमगाव व चिचबन परिसरात सोमवारी रात्री विजांच्या कडकडाटसह तुफान वादळी वाऱ्यासह अवकाळी पावसामुळे पिकांचे मोठ्या प्रमाणात नुकसान झाले आहे. यावेळी पाण्याच्या कमतरतेमुळे केळीची लागवड कमी झाली आहे. त्यामध्ये अवकाळी पावसामुळे केळीचे नुकसान झाल्याने शेतकऱ्यांना लाखो रुपयांचा फटका बसणार आहे.
रात्री अचानक आलेल्या पावसाचा फटका अर्धापूर परिसरातील हळद मजूरांनाही बसला आहे. कामानिमित्त हळदमजूर पार्डी परिरातील आले आहेत. ते शेतातच राहत असल्याने रात्री आलेल्या वादळी वाऱ्यामुळे त्यांच्या राहण्याचे पाले वादळी वाऱ्यात उडून गेली होती. त्यामुळे शेतातील जनावरे किरकोळ जखमी झाली आहेत.
परिसरात हळद काढणी व शिजवण्याचे काम सुरू असल्याने शेतकरी व मजुर रात्री शेतातच मुक्कामाला होते. त्यावेळी अचानक आलेल्या वादळी वाऱ्यामुळे एकच धांदल उडाली. वाऱ्यामुळे विजेचे खांब कोसळून पडले आहेत. त्यामुळे याठिकाणी १२ तास वीजपुरवठा खंडित झाला होता.
