नांदेड- करोना या संसर्गजन्य आजाराला रोखण्यासाठी सरकारने लोकडाऊन घोषित केले आहे. त्याचा थेट परिणाम शेतकऱ्यांवर दिसून येत आहे. सर्व दळण-वळणाची साधने बंद असल्याने लोहा तालुक्यातील बोरगाव येथील एका फळबाग उत्पादकाचे तब्बल २० लाखाचे नुकसान झाले आहे.
किशन गायकवाड यांनी २०१४ मध्ये संत्र्याची बाग लावली. गायकवाड यांनी संत्र्याची तब्बल हजार झाडे लेकरासारखी वाढवली आहेत. कोरडा दुष्काळ असो की, आणखी काही संकट, गायकवाड यांनी नेहमी झाडांची निगा राखली आहे. संत्रा बागेच्या मशागतीसाठी त्यांना दरवर्षी २ लाख रुपये खर्च करावे लागतात, तेव्हा जाऊन फळे काढणीसाठी येतात. इतकी मेहनत घेऊनही कधी ओला दुष्काळ तर कधी कोरड्या दुष्काळामुळे बळीराजा संकटात सापडतोच. यावर्षी शेतीसाठी पोषक वातावरण असताना करोनाच्या संसर्गाने बळीराजा संकटात सापडला आहे.
कोरोनाचे संसर्ग थांबविण्यासाठी पंतप्रधान नरेंद्र मोदी यांनी २१ दिवसाचे लॉकडाऊन घेषित केले. आणी सगळा देश जिथे आहे तिथे थांबला. वाहतुक सेवा बंद झाल्याने शेतकरी गायकवाड यांना आपला फळमाल बाजारत विकण्यासाठी नेता आला नाही. त्यामुळे, संत्रा शेतातच सडत आहे. जवळपास ५० टन संत्रा खराब होण्याच्या मार्गावर असून गायकवाड यांना मोठे नुकसान होत आहे. अशा परिस्थितीत सरकारने मदत करावी अन्यथा आत्महत्ये शिवाय मार्ग नाही, अशी उद्विग्न प्रतिक्रिया शेतकऱ्यांकडून व्यक्त होत आहे.
हेही वाचा- नांदेड-हिंगोली सीमेवर पोलिसांचा चोख बंदोबस्त, नांदेडमधील नागरिकांमध्ये भीतीचे वातावरण
