नांदेड: आंध्र प्रदेशातून वेगळ्या झालेल्या तेलंगणा राज्यात मागील नऊ वर्षांपासून मुख्यमंत्री के. चंद्रशेखर राव यांच्या टीआरएस पक्षाची सत्ता आहे. त्यांच्या सत्ताकाळात तेलंगणात आरोग्य, शिक्षण, उद्योग, कृषी आदी घटकांसाठी केलेल्या कामाची भुरळ सीमावर्ती भागातील गावांना पडत आहे. त्यामुळे तेलंगणाला लागून असलेल्या महाराष्ट्रासह इतर राज्यातील काही गावांनी तेलंगणात जाण्याची इच्छा दर्शविली. त्यात नांदेड जिल्ह्यातील देगलूर, बिलोली, किनवट, भोकर तालुक्यातील काही गावांचा समावेश आहे. परंतु, कायद्यामध्ये तशी तरतुद नाही.
पक्षाची व्याप्ती वाढविणार: दरम्यान, मुख्यमंत्री केसीआर यांनी टीआरएसचा विस्तार देशभर करण्याचे नियोजन केले. त्यासाठी तेलंगणा राष्ट्र समितीचे नाव भारत राष्ट्र समिती करण्यात आले. या बीआरएस पक्षाच्या माध्यमातून के. सी. आर आता देशभरात आपल्या पक्षाची व्याप्ती वाढविणार आहेत. त्याची सुरुवात महाराष्ट्रातून त्यातही नांदेड जिल्ह्यातून होत आहे. त्या अनुषंगाने बीआरएसच्या नेत्यांनी तयारी चालविली आहे. मागील काही दिवसांपासून सीमावर्ती भागातील गावात भेटीगाठी आणि कार्यक्रम वाढले आहेत. त्यातच आता नांदेड शहरात रविवार ५ फेब्रुवारी मुख्यमंत्री के. सी. आर हे स्वतः सभा घेणार आहेत. त्यावेळी ते महाराष्ट्रातील जनतेला तेलंगणा सरकारने केलेल्या कामांची माहिती देण्याबरोबरच देशात काय करणार? याविषयीची सखोल माहिती देतील, असे बीआरएसच्या नेत्यांकडून सांगण्यात येत आहे.
नेते मंडळींनी ठोकला नांदेडमध्ये तळ: सभेला अधिकाधिक लोक यावेत, यासाठी बीआरएसचे जहीराबाद येथील खासदार बी. बी. पाटील, चेन्नूरचे आमदार बालका सुमन, बोधनचे आमदार शकील अहमद, माजी महापौर तथा सिव्हिल सप्लाय चेअरमन रविंदर सिंघ आदी नेते मंडळी नांदेडात तळ ठोकून आहेत. शहरी तसेच ग्रामीण भागात राजकीय, सामाजिक संघटनांचे पदाधिकारी यांच्या घरी बीआरएसचे आमदार, खासदार यांच्या उपस्थितीत झालेल्या बैठकीत नियोजन होत आहे.
बीआरएसमध्ये प्रवेश: जिल्हा परिषदेच्या माजी अध्यक्षांचे पती आणि माजी लोकप्रतिनिधी मुख्यमंत्री के. चंद्रशेखर राव यांच्या उपस्थितीत पक्षप्रवेश करणार आहेत. तसेच माजी नगरसेवक, जि.प. सदस्य यांचाही समावेश आहे. परंतु, नांदेड जिल्ह्याची बीआरएसची धुरा कुणाकडे येते, याकडे सर्वांचे लक्ष लागले आहे. तेलंगणातील नेत्यांच्या हिंदी भाषेलादेखील तेलगु भाषेची जोड येते. त्यामुळे मराठी भाषिकांना समजणे कठीण जाते, परंतु बीआरएसचे खासदार बी. बी. पाटील यांना मराठी भाषा चांगली जमते. त्यामुळे तेच मराठी भाषिक नेते आणि केसीआरमधील खास दुआ बनत आहेत. त्यांच्या पुढाकारातून नांदेड जिल्ह्यातील काँग्रेस, भाजप, राष्ट्रवादी आणि काही सामाजिक संघटनांच्या पदाधिकाऱ्यांच्या घरी बैठका घेण्यात आल्या. त्यातून अनेकजण मुख्यमंत्री केसीआर यांच्या कार्याला प्रेरित होऊन बीआरएसमध्ये प्रवेश करतील, अशी माहिती आहे.
५ फेब्रुवारी रोजी सभा: बीआरएसचे नेते तथा तेलंगणाचे मुख्यमंत्री के. चंद्रशेखर राव हे नांदेडात पहिल्यांदाच ५ फेब्रुवारी रोजी सभा घेणार आहेत. त्यासाठी निश्चित केलेली जागा कमी पडेल, अशी भिती बीआरएसच्या नेत्यांनी व्यक्त केली. सभास्थळाची पाहणी करून वरिष्ठ नेत्यांनी संयोजन समितीला काही सूचना केल्या आहे. जिल्हा परिषदेच्या माजी अध्यक्षांचे पती आणि माजी लोकप्रतिनिधी मुख्यमंत्री के. चंद्रशेखर राव यांच्या उपस्थितीत पक्षप्रवेश करणार आहेत. तसेच माजी नगरसेवक, जिल्हा परिषद सदस्य यांचाही समावेश आहे. परंतु, नांदेड जिल्ह्याची बीआरएसची धुरा कुणाकडे येते, याकडे सर्वांचे लक्ष लागले आहे.
हेही वाचा: Budget 2023 : मोदी सरकारच्या दुसऱ्या कार्यकाळातील शेवटचा पूर्ण अर्थसंकल्प आज सादर होणार
