नांदेड - राजकीयदृष्ट्या अत्यंत महत्वाचा असलेल्या नांदेड जिल्ह्यात एकूण नऊ विधानसभा मतदारसंघ आहेत. काँग्रेस 3, शिवसेना 4, राष्ट्रवादी 1, भाजप 1 असे चित्र आहे. एकेकाळी काँग्रेसचा गड अशी नांदेडची ओळख होती. मात्र, नुकत्याच झालेल्या लोकसभा निवडणुकीत मुख्यमंत्री राहिलेल्या अशोक चव्हाण यांचा पराभव झाला आणि लोहा कंधारचे आमदार प्रताप पाटील भाजपकडून खासदार झाले. त्यामुळे पुन्हा एकदा अशोक चव्हाण यांची सत्त्वपरीक्षा आहे. मात्र, येणाऱ्या विधानसभा निवडणुकीत सेना भाजपची हीच विजयी घोडदौड कायम राहील का याबाबत साशंकता आहे.
हेही वाचा - आचारसंहिता लागताच पालिकेत पदाधिकाऱ्यांच्या दालनाबाहेर शुकशुकाट
लोकसभा निवडणुकीत नांदेडमधून वंचित आघाडीला चांगला प्रतिसाद मिळाला होता. त्यामुळे विधानसभा निवडणूक माजी मुख्यमंत्री अशोक चव्हाण, खा.प्रताप पाटील आणि प्रकाश आंबेडकर यांच्या भोवती केंद्रीत राहणार आहे. लोकसभेच्या वेळी थेट राष्ट्रवादावर मतदान झाले आणि लोकांनी 'फिर एक बार मोदी सरकार' म्हणत सेना-भाजपाला मतदान केले. मात्र, आता विधानसभा निवडणुकीतील मुद्दे पूर्णपणे वेगळे आहेत. सेना भाजपने जिल्ह्याला विकासाच्या बाबत सावत्र वागणूक दिली, असा आरोप काँग्रेसकडून अनेकदा झाला. हा आरोप खोडून काढण्याचे काम युती सरकारने केले नाही. त्यामुळे युतीसाठी जिल्ह्यात पोषक वातावरण आहे, असे चित्र आजघडीला तरी नाही. तर दुसरीकडे काँग्रेसची देखील परिस्थिती फारशी समाधानकारक नाही.
हेही वाचा - एमआयएम विधानसभेच्या 20 टक्के जागा लढवणार - इम्तियाज जलील
स्वत: अशोक चव्हाण हे आपल्या भोकर मतदारसंघातच पूर्णवेळ व्यस्त आहेत. त्यांनी तिथच गुंतून राहावे यासाठी भाजपने निवडणुकीसाठी बापूसाहेब देशमुख गोरठेकर यांना पुढे केलो आहे. त्यामुळे चव्हाण आतापासूनच भोकरमध्ये अडकून पडले आहेत. २०१४ साली झालेल्या विधानसभा निवडणुकीत नांदेडमध्ये काँग्रेस-३ , शिवसेना-४, राष्ट्रवादी-१, भाजप-१ असे चित्र होते. त्यापैकी नांदेड-दक्षिणचे शिवसेनेचे आमदार हेमंत पाटील आता हिंगोलीचे खासदार म्हणून निवडून आले आहेत. तर तत्कालीन सेनेचे लोहा-कंधारचे आमदार असलेले प्रताप पाटील आता नांदेडचे भाजपाचे खासदार म्हणून निवडून आले आहेत.
हेही वाचा - 'लोकशाही महोत्सवाचे स्वागत, सर्वांनी यात सहभागी व्हा'
सद्य राजकीय परिस्थिती पाहता नऊ विधानसभा असलेल्या नांदेड जिल्ह्यात वंचित बहुजन आघाडीचा सत्तेत प्रवेश झाला तर नवल नाही. वंचित आघाडीकडे सक्षम उमेदवार उपलब्ध झाले तर नांदेड हे वंचितच्या सत्तेचे प्रवेशद्वार होऊ शकते. सर्व प्रकारच्या सामाजिक चळवळीत कायम अग्रेसर राहिलेल्या या जिल्ह्याला नेहमीच वेगवेगळे प्रयोग करण्याची परंपरा आहे.
हेही वाचा - मुक्ताईनगर विधानसभा : एकनाथ खडसेंच्या उमेदवारीविषयी संभ्रम; सेना जागेसाठी आग्रही
यापूर्वी प्रकाश आंबेडकरांनी राज्यात भारीप बहुजन महासंघाच्या नावाखाली निवडणुका लढवल्या होत्या. त्यावेळी किनवट मतदारसंघामधून १९९३ साली झालेल्या पोटनिवडणुकीत भीमराव केराम हे विजयी झाले होते. गत तीन निवडणुकींमध्ये राष्ट्रवादीचे आ. प्रदीप नाईक हे निवडून आले आहेत. गत तीन वर्षांतील नाराजीचा फटकाही त्यांना बसू शकतो, अशी चिन्हे आहेत. महाराष्ट्रात ज्यावेळी एमआयएमचे नावही कुणाला माहित नव्हते त्या एमआयएमचे नांदेड महापालिकेत १३ नगरसेवक निवडून देण्याचा विक्रम नांदेडकरांच्या नावे आहे.
हेही वाचा - कन्नड मतदारसंघात जाधवांची प्रतिष्ठा पणाला; शिवसेना लोकसभेचा वचपा काढणार??
त्यामुळे यावेळची विधानसभा निवडणूक खऱ्या अर्थाने प्रस्थापितांसाठी अडचणीची ठरणारी आहे. त्यातच यंदा झालेल्या अत्यल्प पावसामुळे जिल्ह्यात दुष्काळ सदृश्य स्थिती आहे. खरीप हंगामही धोक्यात आला आहे तर रब्बी हंगाम येण्याची आशा मंदावली आहे. पिकविमा, कर्जमाफी याचाही गोंधळ अद्याप कायमच आहे. अनेक वर्ष काँग्रेसची सत्ता असलेल्या या जिल्ह्यात येथील नेत्यांना उद्योगधंदे उभे करताच आले नाहीत. त्यामुळे रोजगारासाठी पुण्या-मुंबई शिवाय पर्याय नाही. नोटाबंदी, जीएसटीमुळे जो काही व्यापार होता तोही ढेपाळला आहे. अशा स्थितीत येणारी विधानसभा निवडणूक महत्वाची मानली जात आहे. त्यातच मतदारांसमोर वेगवेगळे पर्याय उपलब्ध असल्याने मतदार काय कौल देतील यावर सर्व चित्र अवलंबून आहे.
