अशोक चव्हाणांना विरोधक पकडणार कोंडीत...भोकरमधील भाजपच्या हालचाली वाढल्या

भोकरमध्ये यावेळी काँग्रेसकडुन अशोक चव्हाण स्वत: उमेदवार असणार आहेत. त्यामुळे सध्या ते पुर्णवेळ मतदारांच्या गाठी भेटी घेण्यात व्यस्त आहेत. मतदारसंघात सोशल इंजिनियरिंगच्या माध्यमातून सर्व धार्मिक कार्यक्रमांचे आयोजन ते करत आहेत. त्यांना भोकरमध्येच गुंतवून ठेवण्यासाठी भाजपने मोठी खेळी खेळलीय.

नांदेड- जिल्ह्यातील भोकर मतदारसंघ हा माजी मुख्यमंत्री अशोक चव्हाण यांचा बालेकिल्ला आहे. या बालेकिल्ल्याला सुरुंग लावण्याचे काम भाजपने केले आहे. लोकसभेची पुनरावृत्ती करण्यासाठी भाजपची व्यूहरचना सुरू असून त्यांना कोंडीत पकडण्यासाठी विरोधक सरसावले आहेत. लोकसभा निवडणुकीत नाराजीचा मोठा फटका बसल्याने ते पूर्णवेळ मतदारसंघात थांबून आहेत. मतदार आणि कार्यकर्त्यांशी चव्हाण व्यक्तीशः संपर्कात आहेत.

दिवंगत शंकरराव चव्हाण यांचा मतदारसंघ म्हणून भोकर मतदारसंघाची जुनी ओळख आहे. २००९ साली झालेल्या सार्वत्रीक निवडणुकीत अशोक चव्हाण यांनी एक लाख 20 हजारांपेक्षा जास्त मतं घेत विजय मिळवला होता. त्यानंतर २०१४ साली अशोक चव्हाण यांच्या पत्नी अमीता चव्हाण इथुन निवडणुकीच्या रिंगणात उतरल्या होत्या. मात्र, यावेळेस त्यांचे मताधीक्य 20 हजारांनी घटले होते. या दरम्यान, अशोक चव्हाण नांदेडचे खासदार होते. पण या काळात अपेक्षीत विकासकामे झाली नाहीत. याचा काँग्रेसला चांगलाच फटका बसला आणि लोकसभा निवडणुकीत काँग्रेसचा दारुण पराभव झाला.

भोकर मतदारसंघ एकेकाळी सिंचनाने समृद्ध होता. इसापूर धरणाच्या पाण्यावर येथील शेतकरी ऊस, केळी आणि हळद आदी नगदी पिकांचं उत्पादन घेत असत. मात्र, पैंनगंगा नदीवर इसापूर धरणाच्या वरच्या बाजूला अनेक बंधारे झाले आहेत. गेल्या चार वर्षांपासून सिंचनप्रकल्पांचा विकास जवळपास खुंटला आहे. सुधा प्रकल्पाचा अद्याप साधा विस्तार देखील होऊ शकलेला नाही. त्याशिवाय भोकर मतदारसंघात सिंचनाच्या योजनाच न राबवल्यानं हा मतदारसंघ आता भकास होत चालला आहे. प्रसीध्द अर्धापुरी केळी आता नामशेष होते कि काय, अशी भिती निर्माण झाली आहे. केळीवर प्रक्रिया करणाऱ्या उद्योगांची नुसतीच चर्चा होते. मात्र, प्रत्यक्षात तिथे काहीही घडलेले नाही. बेरोजगारी येथील कायमची समस्या आहे. चव्हाणांनी भोकरमध्ये कोणतेच उद्योग आणले नसल्याची टीका मुख्यमंत्री करत असतात. मतदारसंघातील अंतर्गत रस्त्याची अवस्था अतिशय वाईट आहे. गेल्या काही दिवसांत या मतदार संघातील अनेक स्थानिक स्वराज्य संस्थामध्ये काँग्रेसच्या काळात अपहार झाल्याचे आरोप करण्यात आले. अशा स्थीतीत काँग्रेस नेतृत्वाला ही जागा राखण्यासाठी तारेवरची कसरत करावी लागणार आहे.

भोकरमध्ये यावेळी काँग्रेसकडुन अशोक चव्हाण स्वत: उमेदवार असणार आहेत. त्यामुळे सध्या ते पुर्णवेळ मतदारांच्या गाठी भेटी घेण्यात व्यस्त आहेत. मतदारसंघात सोशल इंजिनियरिंगच्या माध्यमातून सर्व धार्मिक कार्यक्रमांचे आयोजन ते करत आहेत. त्यांना भोकरमध्येच गुंतवून ठेवण्यासाठी भाजपाने मोठी खेळी खेळलीय. भोकर मतदारसंघातील राष्ट्रवादी काँग्रेसच्या बहुतांश पुढाऱ्यांनी पक्षाला रामराम करत खासदार प्रताप पाटील यांची गळाभेट घेतली आहे. भाजपकडुन राष्ट्रवादीचे माजी जिल्हाध्यक्ष बापुसाहेब गोरठेकर निवडणुक रिंगणात उतरण्याची दाट शक्यता आहे. बापुसाहेब गोरठेकर यांना अनेक जनाधार असलेल्या नेत्यांचे पाठबळ मिळत आहे. भोकर, अर्धापूर आणि मुदखेडमधील अनेक काँग्रेस कार्यकर्ते भाजपच्या संपर्कात आहेत. खासदार प्रताप पाटील चिखलीकर देखील स्वत: भोकरच्या राजकीय घडामोडींवर लक्ष ठेवून आहेत. त्यामुळे ही लढाई अशोक चव्हाण यांच्यासाठी सोपी नाही.

भाजपतील बापुसाहेब गोरठेकर, निलेश देशमुख, नागनाथ घिसेवाड, सुरेश राठोड, प्रविण गायकवाड, राम चौधरी आदी नेते निवडणुक लढवण्यास उत्सुक आहेत. त्यामुळे पक्षांतर्गत धुसफूसही सुरू आहे. भाजपलाही कार्यकर्त्यांची चांगलीच मनधरणी करावी लागणार आहे. अन्यथा या जुन्या कार्यकर्त्यांच्या नाराजीचा मोठा फटका भाजपला बसू शकतो. शिवसेनेकडुन प्रल्हाद इंगोले, उत्तम जाधव, धनराज पवार, बबन बारसे यांनीही उमेदवारी मागितली आहे. तर वंचित बहुजन आघाडीकडुन नामदेव आयलवाड, केशव मुद्देवाड उत्सुक आहेत.

नुकत्याच झालेल्या लोकसभा निवडणूकीची विधानसभेत पुनरावृती होईल, अशी आशा भाजपाला आहे. तर साखर कारखान्याच्या बळावर आणि वैयक्तीक अशोक चव्हाण यांच्याप्रती असलेल्या नागरिकांच्या प्रेमावर काँग्रेसची भिस्त अवंलबून आहे.