देश-विदेशातून मागणी वाढल्याने केळीच्या दरात सुधारणा; शेतकाऱ्यांमध्ये समाधान

कोरोना आणि लॉकडाऊनमुळे गेल्या दोन वर्षांपासून केळी उत्पादक संकटात सापडला आहे. काही मोजके दिवस सोडले तर दरात फारशी सुधारणा नसल्याचे चित्र होते. संकटात सापडलेल्या केळी उत्पादक शेतकऱ्यांना दिलासादायक चित्र निर्माण झाले आहे.

नांदेड - कोरोना आणि लॉकडाऊनमुळे गेल्या दोन वर्षांपासून केळी उत्पादक संकटात सापडला आहे. काही मोजके दिवस सोडले तर दरात फारशी सुधारणा नसल्याचे चित्र होते. संकटात सापडलेल्या केळी उत्पादक शेतकऱ्यांना दिलासादायक चित्र निर्माण झाले आहे. जिल्ह्यातून देशातील प्रमुख शहरात व इराणसह अनेक देशात केळीच्या निर्यातीला सुरुवात झाली आहे. चारशे ते पाचशे प्रतिक्विंटल आलेला दर आता अकराशे पर्यत गेल्यामुळे शेतकऱ्यांमधूनही समाधान व्यक्त होत आहे.

हेही वाचा - डोंगरगाव शिवारात बिबट्याचा वावर, शेतकऱ्यांमध्ये भीतीचे वातावरण

यंदाही लॉकडाऊनमुळे दर झाले होते कमी

नांदेड जिल्ह्यातील केळी येण्याचा हंगाम आला आणि टाळेबंदीमुळे संकट केळी उत्पादक संकटात सापडले. व्यापारी कोरोनाचे संकट आणि टाळेबंदीमुळे केळीचे दर प्रचंड खाली आले होते. अत्यल्प दरामुळे केळी उत्पादक शेतकऱ्यांचा लागवडी खर्च निघणेही अवघड होऊन बसले होते. गतवर्षीप्रमाणे यंदाही संकटाचा सामना करावा लागतो की काय? अशी भीती केळी उत्पादक शेतकऱ्यांना सतावत होती.

अकराशे रुपये पर्यंत दर

जळगाव आणि बऱ्हाणपूर या भागात वादळी वारे, गारपीट व पावसामुळे केळीच्या बागा आडव्या झाल्या. त्या भागात जो शिल्लक माल आहे त्याचा दर्जाही तितका चांगला नाही. त्यामुळे, या भागात मोठ्या कंपन्या, व्यापाऱ्यांचा अर्धापूर परिसरात केळीकडे कल वाढला आहे. गत काही दिवसांत मागणी वाढल्याने केळीच्या दरात बऱ्यापैकी सुधारणा झाली आहे. देशातील विविध कानाकोपऱ्यातून मागणी वाढली आहे. चारशे ते पाचशे रुपयांपर्यंत प्रतिक्विंटल दर मिळणाऱ्या केळीसाठी अकराशे रुपये पर्यंत दर मिळत आहे. यामुळे केळी उत्पादक शेतकऱ्यांना दिलासा मिळाला असून शेतकऱ्यांतून समाधान व्यक्त होत आहे.

टाळेबंदीत शिथिलता होताच दरात सुधारणा

टाळेबंदीमध्ये शिथिलता होताच परराज्यात केळीची मागणी वाढत असल्याने केळीच्या दरात चांगली सुधारणा झाली आहे. जिल्ह्यातील अर्धापूर परिसरात पिकणारी केळी ही खाण्यासाठी चविष्ट व टिकाऊ असल्यामुळे त्यांना मोठी मागणी असते. चांगले पर्जन्यमान आणि इसापूर-येलदरी धरणात चांगला पाणीसाठा उपलब्ध असल्यामुळे केळीची लागवड झाली होती.

केळी उत्पादक शेतकऱ्यांच्या अपेक्षा उंचावल्या

नांदेड जिल्ह्यातून महाराष्ट्र, उत्तर प्रदेश, कर्नाटक, दिल्ली, पंजाब, हरियाणा या राज्यात केळी पाठविणे सुरू आहे. यामुळे उत्पादक शेतकऱ्यांत समाधान असून दराच्या अपेक्षा उंचावल्या आहेत. दर्जेदार केळीची निवड करून बांधावरच मागणीप्रमाणे पॅकींग करून गाडी भरण्यात येत आहे. तसेच, जहाजांच्या माध्यमातून इराणसह विविध देशांत केळींची निर्यात होत आहे. केळींची मागणी वाढल्यास दरातही चांगली सुधारणा होईल, असे व्यापाऱ्यांनी सांगितले.

आतापर्यंत 200 टन केळी निर्यात

नांदेड जिल्ह्यातून शंभुनाथ अ‌ॅग्रो प्रोड्युसर कंपनीच्या माध्यमातून गेल्या आठ ते दहा दिवसांत इराण, इराक, अफगाणिस्तान, ओमान, दुबईसह इतर देशात 200 टन केळी निर्यात झाली असून यासाठी नऊशे ते अकराशे पर्यंत दर मिळाला आहे. येणाऱ्या काळात पाच ते सहा हजार टन केळी जिल्ह्यातून निर्यात करण्याचे उद्दिष्ट असल्याचे शंभुनाथ अ‌ॅग्रो प्रोड्युसर कंपनीचे निलेश देशमुख यांनी 'ईटीव्ही भारत'शी बोलताना सांगितले.

हेही वाचा - मुलांना भेटण्यास का येत नाहीस म्हणून प्रियकराने केला प्रेयसीचा खून