नांदेड - शिवधारा पतसंस्थेची ८ वी वार्षिक सर्वसाधारण सभा सर्व संचालक मंडळ, सभासद आणि कर्मचाऱ्यांच्या उपस्थितीमध्ये शिवमळा (मरळक फाटा, नांदेड) येथे पार पडली. यावेळी पतसंस्थेच्या यशस्वी वाटचालीत सभासद आणि कमर्चारी या सर्वांचा मोलाचा वाटा आहे, असे वक्तव्य पतसंस्थेच्या अध्यक्षा राजश्री पाटील यांनी केले.
पंतसंस्थेची आतापर्यंतची वाटचाल ही यशस्वी असून येत्या काळात शिवधाराचा उल्लेख राज्यातील यशस्वी पतसंस्थेमध्ये नक्कीच होईल, असा ठाम आत्मविश्वास पाटील यांनी व्यक्त केला. आजपर्यंतच्या वाटचालीत, पतसंस्थेच्या प्रगतीमध्ये ठेवीदार, ग्राहकांनी सहकार्य केले. त्यामुळेच हा पल्ला गाठता येऊ शकला. पुढेही असेच योगदान मिळावे, असेही त्या म्हणाल्या.
जिल्हा उपनिबंधक पी.आर.फडणवीस बोलताना म्हणाले, की शिवधारा या संस्थेने योग्य व्यवस्थापन केले असून त्यांनी आदर्श सि.डी.रेषो मेंटन केला आहे. संस्थेनी जास्तीत जास्त बचत गटांना लघुउद्योगासाठी ऋण वाटप करुन प्रोत्साहन द्यावे, असे आवाहन याप्रसंगी त्यांनी केले. प्रस्ताविकात संस्थेचे तज्ञ संचालक धनंजय तांबेकर यांनी संस्थेच्या मागील आर्थिक वर्षाच्या कामकाजाचा अहवाल व ताळेबंदाचे वाचन केले.
सभेत उत्कृष्ट ठेवीदार विनोद अलमपल्लेवार, उत्कृष्ट कर्जदार गोविंद डाकोरे, उत्कृष्ट दैनिक ठेव प्रतिनिधी जलील अहमद, संतोष कदम, ज्ञानदेव कदम यांना पुरस्कार व मान्यवरांच्या हस्ते सत्कार करण्यात आला. यावेळी जिल्हा विशेष लेखा परीक्षक डी.ए. बैसठाकूर, उपाध्यक्ष कीर्ती तगडपल्लेवार, संचालिका उषा पाटील, सुचिता उखलकर, प्रतीक्षा पतंगे, व्यवस्थापक (प्रशासन) सुरेखा दवे, शाखा प्रभारी आनंद संगावार, सहायक अधिकारी अल्का बोलके, यांच्यासह समस्त कर्मचारी ठेवीदार आणि सभासद उपस्थित होते.
