नागपूर - येथील धरणांमधील पाण्याचा साठा तळाला गेला आहे. अशा परिस्थितीमध्येच आज शहरातील बेसा परिसरात पाईपलाईन फुटली आणि यामध्ये लाखो लिटर्स पाणी वाया गेले आहे. जिल्ह्याला पाणी पुरवठा करणे प्रशासनासाठी आव्हान ठरत आहे. नागपूर शहरात देखील पाण्याची भीषण टंचाई आहे, असे असताना 'दुष्काळात तेरावा महिना' अशी परिस्थिती येथे निर्माण झाली आहे. सध्या नागपूरकरांना रोज १०० एमएलडी कमी पाणीपुरवठा केला जात आहे.
नाली खोलीकरण करत असताना बेसा परिसरातील ही पाईपलाईन फुटली. आणि लाखो लिटर्स पाणी परिसरात शिरले आहे. ही पाईपलाईन फुटल्याने शेजारी असलेल्या बॅंक ऑफ इंडियाची शाखा आणि बेसा येथील एटीएममध्येही पाणी शिरले आहे.
पाईपलाईन फुटलेल्या परिसरात तीन दिवस पाणीपुरवठा बंद राहण्याची शक्यता वर्तविली जात आहे. ५ ते ६ लाख लिटर पाणी वाया गेल्याचा अंदाज प्रत्यक्षदर्शिंनी वर्तवला आहे. पाणी वाया जात असताना बेसा ग्रामपंचायतीतर्फे कोणतीही तत्काळ उपाययोजना केली नसल्याचा आरोप नागरिकांनी केला आहे.
