नागपूर - जेष्ठ विचारवंत पत्रकार आणि राष्ट्रीय स्वयंसेवक संघाचे माजी बौद्धिक व प्रचार प्रमुख माधव गोविंद उपाख्य बाबुराव वैद्य यांचे निधन झाले. वैद्य यांच्या निधनावर अनेकांनी शोक व्यक्त करत, वैद्य यांना श्रद्धाजंली वाहिली. यामध्ये देशाचे पंतप्रधान नरेंद्र मोदी, केंद्रीय मंत्री नितीन गडकरी, विरोधी पक्षनेते देवेंद्र फडणवीस यांच्यासह अनेकांनी शोक संवेदना व्यक्त केल्या. केंद्रीय मंत्री नितीन गडकरी यांनी वैद्य यांच्या पार्थिवाचे दर्शन घेतले. यावेळी त्यांच्यासोबत कांचन गडकरी या देखील उपस्थित होत्या.
मा. गो. वैद्य यांची विधान परिषद सदस्य म्हणून त्यांची कारकीर्द सगळ्या लोकप्रतिनिधींसाठी सदैव आदर्शवत राहील. माझ्या लहानपणापासून बाबुरावजींशी माझा व्यक्तिगत व जवळचा संबंध राहिला आहे. मला कायम त्यांचे मार्गदर्शन आणि आशिर्वाद मिळाले आहेत. खरे तर बाबुरावजी शतायुषी होतील, हा ठाम विश्वास होता. परंतु नियतीच्या मनात काही वेगळेच होते. एक व्रतस्थ आणि ऋषीतुल्य व्यक्तिमत्त्व आपल्यातून निघून गेला. याचे अतीव दुःख असल्याची भावना नितीन गडकरी यांनी व्यक्त केली.
उद्या (रविवार ता. २०) होणार अंत्यसंस्कार
मा. गो. वैद्य यांच्या पार्थिवावर उद्या (रविवार ता. २०) अंबाझरी घाटावर अंत्यसंस्कार केले जाणार आहेत.
राष्ट्रीय स्वयंसेवक संघाच्या अगदी सुरुवातीच्या काळापासूनच संघाकरिता संपूर्ण जीवन समर्पित करणाऱ्या काही निवडक स्वयंसेवकांमध्ये माधव गोविंद उपाख्य बाबुराव वैद्य म्हणजेच सर्वांच्या परिचयाचे मा. गो. वैद्य यांचा समावेश होतो. संघाने दिलेली जबाबदारी सांभाळण्यात स्वत:ला झोकून देणारे मा. गो. वैद्य हे संस्कृतचे व्यासंगी विद्वान होते. त्यांचा जन्म वर्धा जिल्ह्यातील तरोडा या गावी १९२३ साली झाला. मा. गो. वैद्य यांचे चौथीपर्यंतचे शिक्षण तरोड्यात आदितवार दरवाजा प्राथमिक शाळेत झाल्यानंतर त्यांच्या मावस काकाने त्यांना नागपुरात पुढील शिक्षणासाठी आणले.
हेही वाचा - राष्ट्रीय स्वंयसेवक संघाचे माजी प्रवक्ते मा. गो वैद्य यांचा संघ प्रवास..
हेही वाचा - ...ते हिंदुत्वचे भाष्यकार होते; मा. गो. वैद्यांच्या निधनानंतर पुत्र मनमोहन वैद्यांची प्रतिक्रिया
