नागपूर - धनत्रयोदशीच्या निमित्याने नागपुरातील सर्वच बाजारांमध्ये ग्राहकांची मोठी अनियंत्रित गर्दी उसळल्याचे चित्र आजही बघायला मिळाले. गेल्या आठ दिवसांपासून हीच परिस्थिती संपूर्ण नागपुरात बघायला मिळाली आहे. दिवाळीच्या निमित्याने खरेदी करण्याची परंपरा नागपूरकरांनी कायम राखली. मात्र, ही खरेदी करत असताना फिजिकल डिस्टन्सिंगचा फज्जा उडविण्यात मात्र नागपुरकरांनी आघाडी घेतली आहे.
लोकांचं बेजबाबदारपणे वागणं...
बाजारांमध्ये कोरोनाला आमंत्रण देणारी ग्राहकांची गर्दी होत असल्याने मनपा कर्मचाऱ्यांच्या मदतीला पोलीस बंदोबस्त देखील तैनात करण्यात आला आहे. मात्र, तरीही कुणालाही स्वतःच्या आणि इतरांच्या जीवाची पर्वा नसल्याचे त्या कर्मचाऱ्यांना खेदाने नमूद करावे लागले आहे. दिवाळीकरिता बाजारपेठा सजल्या आहेत. मात्र, अजूनही कोरोनाचे संकट कायम आहे याचा विसर मात्र नागरिकांना पडला आहे. नागपुरकरांनी दिवाळीच्या खरेदीसाठी कोणताही भान न ठेवता चक्क बाजारपेठेत झुंबड केलेली आहे. शहरातील बर्डी बाजारपेठेसह इतरही ठिकाणी नागपुरकर गर्दी करत असल्याचे पाहायला मिळत आहे. या संपूर्ण प्रकारामुळे फिजिकल डिस्टन्सिंग हा शब्द फक्त नाममात्र आहे कि काय? असेच चित्र बाजारपेठांमधे पाहायला मिळत आहे.
हेही वाचा - नागपूर: राजकीय नेत्यांसाठी कोरोना गेलाय का?
गेल्या दोन महिन्यांपूर्वी उपराजधानी नागपूर शहर आणि जिल्हा हा कोरोनाचा हॉटस्पॉट ठरला होता. आता कुठे कोरोनाची परिस्थिती आटोक्यात येत असताना पुन्हा दिवाळीच्या पार्श्वभूमीवर सीताबर्डी, महाल, गांधीबाग आणि इतवारी सारख्या गजबजलेल्या बाजारपेठांमधे तोबा गर्दी पाहायला मिळत आहे. कोरोना बाबतच्या कोणत्याही नियमांचे पालन होत नसल्याचे दिसून येत आहे. त्यामुळे एकीकडे प्रशासनाकडून कोरोना नियंत्रणासाठी शर्तीचे प्रयत्न सुरू आहे. शिवाय वारंवार नियमांचे पालन करण्याकरिता आवाहनही केल्या जात आहे. मात्र, नागपुरकरांकडून या सर्व नियमांना तिलाजंली दिल्याचे चित्र दिसून येत आहे.
कोरोनाचं संकट वाढण्याची शक्यता -
बाजारपेठांमधे खरेदी करण्यासाठी आलेल्या बहुतांश नागपूरकरांच्या तोंडावर मास्क सुद्धा पहायला मिळत नाही. खबरदारीचा उपाय म्हणून प्रशासनाने मनपाचे कर्मचारी आणि पोलीस कर्मचारी बाजारात तैनात केले आहेत,मात्र त्यांना देखील गर्दी जुमानत नाही. आपल्या बेजबाबदार वागणुकीमुळे नागपूरातील घटलेली कोरोना रूग्णसंख्या या गर्दीमुळे पुन्हा वाढू शकते याच देखील भान नागरिक विसरले आहेत.
