नागपूर - भाजप नेते सुब्रमण्यम स्वामी यांनी एका मासिकात राष्ट्रीय काँग्रेसचे तत्कालीन अध्यक्ष राहुल गांधी यांच्या संदर्भात आक्षेपार्ह विधान केल्याचा आरोप युवक काँग्रेसचे अध्यक्ष सत्यजित तांबे यांनी केला आहे. यासंदर्भात त्यांच्या नेतृत्वात काँग्रेस कार्यकर्त्यांनी गणेशपेठ पोलीस ठाण्यामध्ये तक्रार अर्ज दाखल केला आहे.
चार दिवसांपूर्वी एका प्रतिष्ठित मासिकात सुब्रमण्यम स्वामी यांचा लेख प्रसिद्ध झाला. त्या लेखात त्यांनी काँग्रेस नेते राहुल गांधी यांच्या संदर्भात वादग्रस्त विधान केले होते. लेखात ते म्हणाले होते की, राहुल गांधी यांना अंमली पदार्थांचे (नशेचे व्यसन) व्यसन आहे. त्यानंतर युवक काँग्रेसच्या कार्यकर्त्यांनी सत्यजित तांबे यांच्या नेतृत्वाखाली आज शहरातील गणेशपेठ पोलीस ठाण्यात जाऊन सुब्रमण्यम स्वामी यांच्या विरोधात तक्रार स्वरुपाचा अर्ज दाखल केला आहे.
सुब्रमण्यम स्वामी यांच्या वक्तव्यामुळे काँग्रेस नेते राहुल गांधी यांच्यासह पक्षाची बदनामी झाल्याचा आरोप करण्यात आला आहे. या आक्षेपार्ह विधानामुळे कॉंग्रेसच्या प्रत्येक कार्यकर्त्याला अपमानित वाटू लागले आहे, असे तांबे म्हणाले. सुब्रमण्यम स्वामी यांच्या विरोधात कायदेशीर कारवाई व्हावी, अशी मागणी युथ काँग्रेसचे अध्यक्ष सत्यजित तांबे यांनी केली. यावेळी शेकडो युवक काँग्रेसचे कार्यकर्ते उपस्थित होते.
