नागपूर - वन विभागाच्या चमूला मिळालेल्या माहितीच्या आधारे वाघाच्या अवयवांची तस्करी करणाऱ्याला अटक करण्यात आली आहे. जागतिक व्याघ्र दिनाच्या संध्येला मध्यप्रदेशच्या बीछवासाहानीमध्ये गुरवारी (काल) रात्री धाड टाकत मोठी कारवाई केली आहे. यामध्ये वाघाची पूर्ण कातडी आणि चार पंजे जप्त केले आहे. मोतीलाल केजा सलामे वय (55) असे अटक केलेल्या आरोपीचे नाव आहे.
नागपूर वनविभागाच्या चमूला मध्यप्रदेशात एका व्यक्तीकडे वाघाचे अवयव असून त्या अवयवांची तस्करी करत असल्याची माहिती मिळाली. या अवयवांची नागपूर जिल्ह्यात विक्री होणार असल्याची माहिती मिळाली. यावर वनविभाग माघावर असताना व्याघ्र दिनाच्या संध्येला ही कारवाई करण्यात आली. यात 55 वर्षीय मोतीलाला केजा सलामे हा शेतात राहत असून त्याच ठिकाणी असलेल्या घरात त्याच्याकडून मृत वाघाची संपूर्ण कातडी आणि ४ पायाचे पंजे जप्त केले. यासोबत आरोपीकडून 1 मोबाइलही जप्त करण्यात आला आहे. या प्रकरणात मोतीलाल केजा सलामे याच्या विरोधात वन्यजीव संरक्षण अधिनियमा अंतर्गत गुन्ह्याची नोंद करण्यात आली आहे. या प्रकरणाच्या अधिक चौकशीकरीता नागपूर वनविभागाव्दारे प्रथम श्रेणी न्यायदंडाधिकारी, सावनेर यांचे न्यायालयातून आरोपीला हजर करून 3 ऑगस्टपर्यंत वन कोठडी मिळाल्याची माहिती उपवनसंरक्षक डॉ.भारत सिंह हाडा यांनी दिली आहे.
वन कोठडीत मिळणार 'या' प्रश्नाची उत्तरे
वन कोठडीतील आरोपीकडून वाघाची हत्या नेमकी कोणी, किती लोकांनी केली. कुठल्या भागातील हा वाघ होता. यात ही शिकार तस्करांच्या सांगण्यावरून केली आहे का? या सर्व प्रश्नांची उत्तरे वन कोठडीत असलेल्या आरोपीकडून मिळवण्याचा प्रयत्न वनविभाग करत आहे. तस्करांची टोळीचा मागोवा घेण्याचा प्रयत्न केला जात आहे. या प्रकरणात उपवनसंरक्षक डॉ. भारत सिंह हाड़ा यांच्या मार्गदर्शनाखाली पथक प्रमुख उमरेडचे साहयक वनसंरक्षक एन.जी. चांदेवार, खापा वनपरिक्षेत्र अधिकारी पी एन नाईक, वनपरिक्षेत्र अधिकारी बुट्टीबोरी वनपरिक्षेत्र अधिकारी एल. व्ही. ठोकळ, एस.बी.मोहोड, वनपरिक्षेत्रातील वनरक्षक डोंगरे, शेंडे, आणि मोरले यांनी ही कारवाई केली. या प्रकरणात पुढील तपास सहायक वनसंरक्षक (तेदू व कम्पा) सुरेन्द्र काळे हे करत आहे.
