एका लग्नाची गोष्ट : गृहमंत्री करणार कन्यादान तर जिल्हाधिकारी होणार वर पिता

समीर आणि वर्षा हे दोघेही मुकबधीर असून, अनाथ आहेत. त्यांचा सांभाळ अमरावती जिल्ह्यातल्या वझ्झरमधील शंकरबाबा पापडकर यांनी केला आहे. वर्षा अनाथ असल्यामुळे तिच्या कन्यादानाची जबाबदारी गृहमंत्री अनिल देशमुख यांनी स्वीकारली आहे. तर नागपूरचे जिल्हाधिकारी रवींद्र ठाकरे हे वर पिता होणार आहेत.

नागपूर - भारतीय संस्कृतीत लग्नाच्या संकल्पनेला फार महत्व आहे. आयुष्याच्या ठराविक वळणावर लग्न केले जाते. मात्र ज्यांचं या जगात कुणीही नाही असे अनेक तरुण, तरुणी आपल्या समाजात आहेत. त्यातही ज्यांच्या शरीरात व्यंग आहे, अशा लोकांसाठी तर समाजातील परिस्थिती फारच कठीण आहे. अमरावती जिल्ह्यातील परतवाडा तालुक्यातील वझ्झर येथील समाजसेवक शंकरबाबा पापडकर हे अशा तरुणांसाठी मोठा आधार म्हणून पुढे आले आहेत. त्यांनी अनेकांना दत्तक घेऊन त्यांचे संगोपन केले आहे, एवढंच नाही तर शंकरबाबा पापडकर यांनी दत्तक घेतलेल्या २३ मुलींचे लग्न देखील लावून दिले आहे.

आता ते त्यांच्या संस्थेमधील आणखी एका मुलीच्या लग्नाची तयारी करत आहेत. वर्षा असे तिचे नाव आहे, मात्र दुर्दैवाने वर्षा बोलू आणि ऐकू शकत नाही, त्यामुळे तिच्या समरूप वर शोधणे फार मोठे आवाहन होते, पण त्यांच्याच आश्रमातील समीर नावाच्या तरुणाने वर्षाचा स्वीकार केला आहे. विषेश म्हणजे वर्षा प्रमाणेच समीर सुद्धा बोलू आणि ऐकू शकत नाही. या विवाहसोहळ्याची जय्यत तयारी सुरू आहे. मात्र वर्षा आणि समीर या दोघांनाही आईवडील नाहीत, त्यामुळे वर्षाच्या कन्यादानाची जबाबदारी आता थेट गृहमंत्री अनिल देशमुख यांनी घेतली आहे. तर नागपूरचे जिल्हाधिकारी रवींद्र ठाकरे हे वर पिता म्हणून कर्तव्य पार पडणार आहेत. आजपासून कौटुंबिक कार्यक्रमांना सुरुवात झाली असून, जिल्हाधिकारी ठाकरे यांच्या कुटुंबाने आज नवं दाम्पत्यासाठी त्यांच्या निवासस्थानी विशेष मेजवानी आयोजित केली होती.

23 वर्षांपूर्वी वर्षा आली होती अनाथालयात

अमरावती जिल्हयातील वझ्झर येथे स्वर्गीय अंबादासपंत वैद्य मतीमंदी आणि मुकबधीर अनाथालय आहे. या अनाथालयामध्ये 23 वर्षांपूर्वी वर्षा दाखल झाली होती. या संस्थेत तिचा सांभाळ करण्यात आला. तर मुंबईमधील बोरिवलीतून समीर या अनाथालयात दाखल झाला, त्याला देखील आई वडील नाहीत. त्याचा देखील सांभाळ शंकरबाबा पापडकरांनी केला. त्याला सातवीपर्यंत शिकवले, स्वावलंबी केले. जेव्हा त्याने याच अनाथालयात असलेल्या वर्षाशी लग्न करण्याची इच्छ व्यक्त केली. तेव्हा शंकरबाबांनी या दोघांच्या लग्नाचा निर्णय घेतला. वर्षाचे कन्यादान गृहमंत्री अनिल देशमुख करणार आहेत.

समाजाला प्रेरणा देणारा प्रसंग- जिल्हाधिकारी

समीर आणि वर्षा दोघेही अनाथ आहेत. सामाजिक दायित्व स्वीकारुन रविंद्र ठाकरे यांनी वर पित्याची जबाबदारी स्वीकारली आहे. दिव्यांगाच्या पुनर्वसनासाठी कायम पर्यत्नशील असलेल्या शंकरबाबा पापडकर यांची मानस कन्या व मानस पुत्र यांचा विवाह सोहळा एक राष्ट्रीय महोत्सव म्हणून साजरा व्हावा, तसेच दिव्यांगाच्या पुनर्वसनाबद्दल सामाजिक बांधिलकी वृध्दीगंत व्हावी, अशी इच्छा यावेळी रविद्र ठाकरे यांनी व्यक्त केली आहे. तसेच हा समाजाला प्रेदणा देणारा प्रसंग असल्याचेही त्यांनी म्हटले आहे.