नागपूर - "गो-एअर' या विमान कंपनीत काम करत असलेल्या एका 19 वर्षीय तरुण कर्मचाऱ्याने गळफास घेऊन आत्महत्या केली आहे. अजनी हद्दीतील चंद्रमणीनगर येथे ही घटना घडली. मंथन चव्हाण असे या आत्महत्या केलेल्या तरुणाचे नाव आहे. वरिष्ठांच्या जाचाला कंटाळून त्याने आत्महत्या केल्याचा आरोप कुटुंबियांनी केला आहे.
नागपूर शहरातील चंद्रमणी नगर येथे राहणारा मंथन अभ्यासात हुशार होता. १२ वी चे शिक्षण घेतल्यावर त्याने एव्हिएशन अभ्यासक्रम निवडला. नागपुरात २ वर्षांचा एव्हिएशनचा अभ्यासक्रम सुरु असतानाच 'गो एअर' या हवाई कंपनीत तो ग्राउंड स्टाफ पदावर ९ महिन्यापूर्वी रुजू झाला. १५ दिवसांपासून मंथन आजारी होता. त्यामुळे तो सुट्टीवर घरीच होता. त्याला कावीळ झाल्याचे निदान झाले. त्यामुळे त्याला आणखी काही दिवस सुट्टीची आवश्यकता होती. मात्र, कंपनीतील अधिकारी आजारी असूनही त्याला कामावर हजर राहण्यासाठी दबाव टाकत असल्याचा आरोप मृत मंथनच्या कुटुंबीयांनी केला आहे.
कामावर रुजू हो नाही तर नोकरी सोडावी लागेल, या तणावातून मंथनने आत्महत्या केल्याचा आरोप मंथनच्या कुटुंबीयांनी केला आहे. मृत मंथनची आई पोलीस दलात कार्यरत आहे. वडील एक्स रे तंत्रज्ञ असून त्याला एक १२ वर्षाचा लहान भाऊ आहे. गुरवारी दुपारी ३ च्या सुमारास मंथनने त्याच्या राहत्या घरीच बेडरूममध्ये लोखंडी खिडकीवर दोरीने गळफास घेऊन आत्महत्या केली. कावीळ झाल्याचे मेडिकल रिपोर्टही कंपनीला देण्यात आले होते. मात्र, त्याला वारंवार कामावर हजर राहण्यासाठी सांगितले जात होते. याप्रकरणी मृत मंथनच्या मोबाईलचा सीडीआर रेकॉर्ड तपासला जाईल. कंपनीच्या अधिकारी व कर्मचाऱ्यांचे जबाब नोंदवल्यावर आत्महत्येचे नेमके कारण समजेल, असे पोलिसांनी सांगितले आहे.
गुरवारी मंथनच्या आईचा वाढदिवस होता. आत्महत्येपूर्वी पोलिसांना एक चिट्ठी सापडली आहे. त्यावर 'हप्पी बर्थ डे मम्मी,सॉरी' एवढेच लिहिले असल्याचे पोलिसांनी सांगितले. त्यामुळे कंपनीतील अधिकाऱ्यांच्या त्रास कि दुसरे काही कारण या आत्महत्येमागे आहे याचा तपास पोलीस करत आहेत. पोलिसांनी याप्रकरणी अकस्मात मृत्युची नोद दाखला केली आहे.
