नागपूर : काँग्रेसचे आमदार धीरज देशमुख कर्नाटकच्या दौऱ्यावर असताना त्यांनी काही घोषणा दिल्या आहेत. त्यामुळे सीमावर्ती भागात राहणाऱ्या मराठी सीमाबांधवांच्या जखमेवर मीठ चोळले आहे. आता संजय राऊत, उद्धव ठाकरे गप्प का, आता हे झोपलेत का असा प्रश्न भारतीय जनता पक्षाचे प्रदेशाध्यक्ष चंद्रशेखर बावनकुळे यांनी उपस्थित केला आहे. त्यांच्या प्रतिक्रियेची आम्ही सर्व वाट पाहत आहोत. उद्धव ठाकरे तर अशा विषयी लवकर प्रतिक्रिया देत होते. धीरज देशमुख यांच्या वक्तव्याचा आम्ही निषेध व्यक्त करतो, असेही बावनकुळे म्हणाले आहेत.
ठाकरेंना सहानुभूती मिळणार नाही : उद्धव ठाकरे यांच्या सभेला मोठे करण्यासाठी पैशांचा गैरवापर केला जातो. तिन्ही पक्षाचे कार्यकर्ते पाठवले जाते. उद्धव ठाकरेंच्या मागे सहानुभती आहे, असे दाखवण्याचा तिन्ही पक्ष प्रयत्न करत आहे. आता त्यांना सहानुभती मिळणार नाही. राहीलेले आमदार, खासदार लोकप्रतिनिधी टिकवण्यासाठी उद्धव ठाकरे दौरे करत आहेत. उद्धव ठाकरेंनी हिंदूत्त्वाशी समझोता केला म्हणून कार्यकर्ते त्यांच्यासोबत राहणार नाही, असे बावनकुळे म्हणाले आहेत.
नाना पटोलेंनी टीका करू नये : होळी रंगाची उधळण करणारा उत्सव आहे. या दिवशी सर्वांनी जुने वाद विसरावे. त्यामुळे नाना पटोले यांनी किमान होळीच्या दिवशी टिका करु नये, आज तरी त्यांनी पक्ष फुटतोय ते थांबवावे. नाना यांनी होळीसमोर नतमस्तक होऊन काँग्रेस फुटू नये, अशी प्रार्थना करावी, असा टोला बावनकुळेनी नाना पटोलेंना लावला आहे.
शेतकऱ्यांना मिळणार मदत : चंद्रशेखर बावनकुळे पुढे म्हणाले की, एकनाथ शिंदे आणि देवेंद्र फडणवीस सरकार शेतकऱ्यांना सर्वतोपरी मदत देण्यासाठी सदैव तत्पर आहे. या सरकारने शेतकऱ्यांना भरपूर नुकसान भरपाई वितरीत झाली आहे. तसेच यापुढे देखील झालेल्या नुकसानीची मदत मिळेल, असा दावा चंद्रशेखर बावनकुळे यांनी केला आहे.
आमची ५१ टक्क्यांची तयारी : चौघांनी एकत्र यावे आम्ही ५१ टक्के मतांची तयारी केली आहे. शरद पवार यांनी कसबा निवडणूकीचे विश्लेषण करावे. हा महाविकास आघाडीचा नाही, तर रविंद्र धंगेकरांचा विजय आहे. त्यांच्याबद्दल सहानुभूती होती. आम्ही कसबामध्ये आमची मते घेतलीच आहे. महाविकास आघाडीला मिळालेली जास्त मते धंगेकर यांचीच आहेत. महाविकास आघाडी सरकारला कसब्याचा प्रयोग महाराष्ट्रात करायला थांबवले कुणी आहे? आम्ही आमची ५१ टक्क्यांची तयारी करतो आहे, असे चंद्रशेखर बावनकुळे म्हणाले आहेत.
उपराजधानीला ११५० कोटी : बावनकुळे पुढे म्हणाले की, उपराजधानी नागपूरचे ४ हजार कोटी रुपये महाविकास आघाडीने थांबवले होते. ते आता या सरकारने दिले आहे. पालकमंत्री देवेंद्र फडणवीस यांचे आभार मानतो आहे. त्यांनी डीपीसी ८०० कोटीची केली. तर इतर योजना मिळून ११५० कोटी नागपूरला मिळणार आहे.
हेही वाचा : Sanjay Shirsat on Aurangzeb grave : औरंगजेबाची कबर हैदराबादला हलवा, शिवसेना आमदार संजय शिरसाट यांची मागणी
