एप्रिलच्या पहिल्या पाच दिवसात 286 जणांचा मृत्यू; 19 हजार बाधितांची भर

गेल्या वर्षभरापासून राज्यात कोरोनाने धुमाकूळ घातला आहे. शासन, प्रशासन आणि आरोग्य विभागाने अथक प्रयत्न करून कोरोना आटोक्यात आणण्याचा प्रयत्न केला होता. त्यात त्यांना यशही आले होते. मात्र, गेल्या काही दिवसांपासून पुन्हा कोरोना रूग्णांच्या संख्येत वाढ होताना दिसत आहे. यामुळे आरोग्य यंत्रणांवरील ताण पुन्हा वाढला आहे. नागपूरमध्ये एकूण लोकसंख्येच्या तुलनेत सध्या कोरोना रूग्णांची संख्या जास्त असल्याचे समोर आले आहे.

नागपूर - जिल्ह्यात मागील अडीच महिन्यांपासून सातत्याने कोरोनाच्या रूग्ण संख्येत वाढ होत आहे. त्यात मागील काही दिवसात मृतांचा आकडा वाढल्याने भयावह परिस्थिती निर्माण झाली आहे. फेब्रुवारीच्या तिसऱ्या आठवड्यापासूनची परिस्थिती चिंता वाढवणारी आहे. गेल्या पाच दिवसात 19 हजार नविन बाधितांची भर पडली असून 286 जणांचा मृत्यू एकट्या नागपूर जिल्ह्यात झाला आहे.

नागपूर जिल्ह्यात मागील 24 तासाची परिस्थिती पाहता बाधितांच्या आणि मृत्यूच्या संख्येत किंचित घट नोंदवली गेली आहे. कोरोना रूग्णसंख्येत 3 हजार 519 बाधित रूग्णांची भर पडली आहे. सोमवारी 57 जणांच्या मृत्यूची नोंद झाली तर, रविवारी 62 जणांचा मृत्यू झाला होता. 3 हजार 703 रूग्ण कोरोनातून बरे झाले आहेत. सध्या नागपुरात 41 हजार 130 अ‌ॅक्टिव्ह रूग्ण आहेत.

नागपूर जिल्ह्यात 1 एप्रिल ते 5 एप्रिल दरम्यान 286 जणांचा मृत्यूची नोंद झाली आहे. याच पाच दिवसात 19 हजार 87 बाधितांची भर पडली.

• 1 एप्रिल 60 जणांचा मृत्यू, 3 हजार 630 बाधित रूग्ण
• 2 एप्रिल 60 जणांचा मृत्यू, 4 हजार 108 बाधित रूग्ण
• 3 एप्रिल 47 जणांचा मृत्यू, 3 हजार 720 बाधित रूग्ण
• 4 एप्रिल 62 जणांचा मृत्यू, 4 हजार 110 बाधित रूग्ण
• 5 एप्रिल 57 जणांचा मृत्यू, 3 हजार 519 बाधित रूग्ण

पूर्व विदर्भातील सहा जिल्ह्यांमध्ये नागपुरात 3 हजार 519, भंडारा 656, चंद्रपूर 265, गोंदिया 253, वर्धा 314 बाधित असून गडचिरोलीमध्ये सर्वाधिक कमी 79 बधितांची नोंद झाली आहे. पूर्व विदर्भात कोरोनाने 76 जण दगावले आहेत. तर, 4 हजार 670 बाधित कोरोनातून बरे झाले आहेत.

हेही वाचा - LIVE UPDATE : राज्यातील कोरोनासंदर्भातील ताज्या घडामोडी जाणून घ्या एका क्लिकवर