मुंबई - लग्न जमत नसल्याने आलेल्या नैराश्यातून गुरुवारी एका 40 वर्षीय महिलेने इमारतीवरून उडी मारून आत्महत्या केल्याची घटना कांदिवली परिसरात घडली आहे. चारकोप पोलीस ठाण्याच्या हद्दीतील रॉक एव्हेन्यू इमारतीच्या सहाव्या मजल्यावरून या महिलेने उडी घेतली. डिंपल वाडीलाल, असे मृत महिलेचे नाव आहे. महिला इमारतीवरून उडी मारतानाची घटना कॅमेऱ्यात कैद झाली आहे.
डिंपल इमारतीच्या सहाव्या मजल्यावरून उडी मारताना या व्हिडिओमध्ये पाहायला मिळत आहे. आत्महत्या करण्यापूर्वी त्यांना अडवण्याचा प्रयत्न करण्यात आला होता. इमारतीच्या गच्चीवर डिंपल यांना वाचवण्यासाठी एक व्यक्ती पुढे सरसावल्याचेही या व्हिडिओमध्ये दिसत आहे. मात्र, त्या व्यक्तीने डिंपल यांना पकडण्याआधीच डिंपल इमारतीवरून खाली पडल्या.
हेही वाचा - स्वतःवर गोळी झाडून एकाची आत्महत्या, नंदुरबारातील घटना
गेल्या काही महिन्यांपासून बेरोजगारी असल्याने डिंपल मानसिक तणावाखाली होत्या. नोकरी नसल्याने त्यांचे लग्नही जमत नव्हते, अशी माहिती डिंपल यांच्या आईने दिली आहे. या सर्व गोष्टींमुळे नैराश्याखाली येऊन डिंपलने आत्महत्येसारखे टोकाचे पाऊल ऊचलल्याचे प्राथमिक तपासात समोर आले आहे. या संदर्भात चारकोप पोलिसांनी अपघाती मृत्यूची नोंद केली असून अधिक तपास सुरू आहे.
