मुंबई - मुंबईत सुरु होणाऱ्या मेट्रो कारशेडसाठी गोरेगांव आरे येथील तब्बल 2200 झाडे तोडण्याचा प्रस्ताव मेट्रो रेल्वे कॉर्पोरेशनने वृक्ष प्राधिकरण समितीपुढे मंजुरीसाठी सादर केला होता. झाडे तोडण्यास शिवसेनेचा विरोध असल्याने वृक्ष प्राधिकरणाने हा प्रस्ताव फेटाळला होता. आज वृक्ष प्राधिकरण समितीच्या सदस्यांनी आरे येथे भेट दिली.
मेट्रोसाठी आरेमध्ये कारशेड बांधण्याचा हट्ट सोडा - शिवसेनेचा इशारा यावेळी स्थानिक नागरिकांनी कोर्टात दोन केसेस प्रलंबित असल्याचे निदर्शनास आणले. या केसेसबाबतची माहिती पालिका प्रशासनाने द्यावी. मेट्रोसाठी आरेमध्ये कारशेड बांधण्याचा हट्ट सोडून पर्यायी जागेचा विचार करावा, असे स्पष्ट मत स्थायी समितीचे अध्यक्ष यशवंत जाधव मांडले आहे.यामुळे आरेमध्ये उभारण्यात येणाऱ्या कारशेडबाबत प्रश्नचिन्ह निर्माण झाले आहे. मुंबईत मेट्रोचे जाळे उभारले जात आहे. मेट्रोच्या कारशेड उभारणीसाठी गोरेगांव येथील जागा निश्चित करण्यात आली आहे. कार शेडसाठी 2238 झाडे कापण्याचा प्रस्ताव मुंबई मेट्रो रेल कॉर्पोरेशनने पालिकेच्या वृक्ष प्राधिकरण समितीपुढे मंजुरीसाठी सादर केला आहे. झाडे मेट्रोसाठी उभारण्यात येणाऱ्या कार डेपोच्या बांधकामात अडथळा ठरत आहेत. ही झाडे कापण्यास शिवसेनेसह पर्यावरण प्रेमींकडून तीव्र विरोध होत असल्याने हा प्रस्ताव गेली दोन वर्ष रखडला आहे. दोन वर्षांनंतर मागील आठवड्यात हा प्रस्ताव वृक्षप्राधिकरण समितीपुढे पुन्हा मंजुरीसाठी आणण्यात आला होता. या प्रकल्पामुळे 27 आदिवासी पाडे विस्थापनाचा प्रश्न निर्माण झाला आहे. यामुळे आठवडाभरापूर्वी जागेची पाहणी केल्यावर निर्णय घेऊ, असे यशवंत जाधव यांनी सांगितले होते.त्यानुसार वृक्ष प्राधिकरण सदस्यांनी ठरल्याप्रमाणे आज आरे येथील जागेची पाहणी केली. या पाहणी दरम्यान स्थानिक नागरिकांचा आक्रोश आम्ही पाहिला. नागरिकांचा झाडे तोडण्याला विरोध आहे. त्याबाबत दोन खटले न्यायालयात सुरु आहेत.झाडे तोडण्याच्या विरोधात तब्बल 80 हजार तक्रारी पालिकेकडे आल्या आहेत. त्या तक्रारींना पालिकेने काय उत्तर दिले, याची सविस्तर माहिती पालिका प्रशासनाने वृक्ष प्राधिकरण समितीला दिलेली नाही. मेट्रो कार शेडबाबत त्रिसदस्यीय समिती नेमण्यात आली होती. आरे कॉलनीत होणारी संभाव्य वृक्षतोड टाळण्यासाठी नेमलेल्या तज्ज्ञ समितीने दोन पर्याय सुचवले आहेत. कारशेडसाठी आरे कॉलनीऐवजी कांजुर मार्ग येथील जागेचा पर्याय सुचवण्यात आला आहे. आरे ऐवजी पर्यायी जागेवर कारशेड उभारावे असे यशवंत जाधव यांनी संगितले.
