मुंबई - कुख्यात गुंड रवी पुजारी यास आफ्रिका खंडातील सेनेगल देशातून भारतात रविवारी रात्री उशिरा बंगळुरू विमानतळावर आणण्यात आले आहे. भारतात त्याचावर हत्या, हत्येचा प्रयत्न, खंडणी, खंडणीसाठी धमकावणे, बेकायदेशीर कृत्य करणे, संघटित गुन्हेगारी करणे यांसारखे २५० पेक्षा जास्त गंभीर गुन्हे दाखल आहेत. सेनेगलमध्ये रवी पुजारी हा अँथनी फर्नांडिस या नावाने वावरत होता. सेनेगलमधील तपास यंत्रणांच्या लेखी दस्तावेजात या नावाची नोंद आढळून आली आहे. खंडणीच्या पैशातून त्याने 'नमस्ते इंडिया' नावाच्या हॉटेल्सची श्रृंखला देखील सुरू केली आहे.
बुर्किना फासो या देशाचा पासपोर्ट रवी पुजारीकडून जप्त करण्यात आला आहे. तो मलेशिया, मोरोक्को आणि थायलंड, पश्चिम आफ्रिकेतील बुर्किना फासो, रिपब्लिक ऑफ कांगो, गिनी, आयव्हरी कोस्ट आणि सेनेगल या देशात सतत ठिकाण बदलून राहत होता. त्याने गेल्या अनेक वर्षात खंडणी उकळून मिळालेल्या पैशांतून 'नमस्ते इंडिया' या नावाने रेस्टोरंटची श्रृंखला सुरू केली आहे. तर, सेनेगलची राजधानी डकारमधील श्रीमंतांपैकी एक अशी त्याची ओळख झाली होती.
पुजारीवर सतत भारतीय गुप्तचर यंत्रणांची नजर होतीच यामुळे वेळ मिळताच सापळा रचून त्याला बेड्या ठोकण्यात आल्या. याआधी पुजारीला गेल्या वर्षी जानेवारीत अटक करण्यात आली होती. सेनेगलच्या डकारमधील एका आलीशान केस कर्तनालयातून पुजारीला अटक करण्यात आली होती. मात्र, जामीन मिळवून तो फरार झाला होता. पण आता पुन्हा सेनेगलमधूनच त्याच्या मुसक्या आवळण्यात आल्या आहेत. यावेळेस पुजारी पुन्हा जामीनचा फायदा घेत फरार होऊ नये याकरता भारतीय यंत्रणांनी प्रत्यार्पणाची प्रक्रिया पुर्ण करून त्यास भारतात आणले आहे.
हेही वाचा - अर्थसंकल्पापूर्वीच ठाकरे सरकारने पुरवणी मागण्या केल्या सादर, कर्जमाफीसाठी १५ हजार कोटींची तरतूद
अँथनी फर्नांडिस हे नाव बदलून रवी पुजारी गेली ८-१० वर्षे आफ्रिकेतील सेनेगलमधील डकारमध्ये राहत होता. गेल्यावर्षी अटक झाल्यावर फरार झालेला पुजारी पुन्हा त्याच्या कुटुंबाला घेऊन जाण्यास डकारमध्ये आला होता. पण हा भारतीय गुप्तचर यंत्रणांचा सापळा होता, ज्यात तो सहज अडकला. याआधी पुजारीच्यावतीने प्रत्यार्पणास आव्हान देणारी याचिका सेनेगलच्या सुप्रीम कोर्टात दाखल करण्यात आली होती. ही याचिका सुप्रीम कोर्टाने फेटाळून लावल्याने पुजारीची चारही बाजूने कोंडी झाली होती.
रवी पुजारीवर कर्नाटक राज्यातील बंगळुरुमध्ये ३९ गुन्हे, मंगळूरमध्ये ३६, उडुपीमध्ये ११ तर म्हैसूर, हुबळी-धारवाड, कोलार आणि शिवमोगामध्ये प्रत्येकी एक गुन्हा दाखल आहे. तसेच महाराष्ट्र मुंबई पोलिसांच्या रेकॉर्डमध्येही पुजारीविरुद्ध ४९ गुन्ह्यांची नोंद आहे. त्यातील २६ गुन्हे मोक्काखाली दाखल झाले असून गुजरातमध्ये त्याच्याविरुद्ध खंडणी प्रकरणी ७५ गुन्ह्यांची नोंद आहे.
हेही वाचा - 'ती' भिंत मोदींच्या अकार्यक्षमतेचे स्मारक - मंत्री थोरात
