स्कॉर्पिओ, इनोव्हा, मर्सडीज 'या' ३ कारमध्ये दडलेय वाझे प्रकरणाचे गुढ

सध्याच्या स्थितीत या तीनही कार बरोबर वाझेंचा कुठेना कुठे संबध आलेला दिसून येत आहे, असे एनआयएच्या सुत्रांचे म्हणणे आहे. त्यामुळे कारचा कापर कसा कसा आणि कुठे कुठे करण्यात आला याचा शोध एनआयएला घ्यावा लागणार आहे.

मुंबई - अँटिलिया आणि मनसुख हिरेन हत्या प्रकरणाचे गुढ आणखीन वाढले आहे. त्यात या प्रकरणाचा तपास तीन गाड्यांभोवती फिरत असल्याचेही दिसून येत आहे. पहिल्यादा स्कॉर्पीओ त्यानंतर इनोव्हा आणि आता मर्सडीज कारची या प्रकरणात इंन्ट्री झाली आहे. त्यामुळे या सर्व गाड्या प्रकरणाचे गुढ उकलण्यास मदत करणार का? याकडे सर्वांचे लक्ष लागले आहे.

अंबानींच्या घरा बाहेर सापडली स्कॉर्पिओ

24 आणि 25 फेब्रुवारीच्या रात्री मुंबईतल्या प्रियदर्शनी पार्क जंक्शनजवळ एक स्कॉर्पियो थांबली होती. मध्यरात्री पावणे दोन वाजता त्याच ठिकाणी एक पांढरी इनोव्हा आली आणि या दोन्ही गाड्या पुढे मुकेश अंबानी यांच्या निवसस्थानाच्या दिशेने गेल्या. स्कॉर्पिओ अंबानी यांच्या घराबाहेर पार्क करण्यात आली. तर बरोबरची पांढरी इनोव्हा मुलुंड टोलनाका पार करून ठाण्याच्या दिशेने गेली आणि नंतर गायब झाली. यासर्व बाबी सीसीटीव्हीतून स्पष्ट झाल्या. पार्क केलेल्या स्कॉर्पिओमध्ये स्फोटके सापडली आणि नंतर तपासीची चक्रे फिरू लागली. सुरूवातीला या गाडीच्या मालकाचा शोध घेण्यात आला. त्यानुसार ही गाडी मनसुख हिरेन यांची असल्याचे समजले. मात्र, आपली गाडी चोरीला गेल्याची तक्रार त्यांनी यापूर्वीच केली होती. मुळात ही गाडी सॅम न्यूटन या व्यक्ती असल्याचे गृहमंत्र्यांनी सांगितले होते. न्यूटन यांनी पैसे थकवल्या कारणाने हिरेन यांनी ही गाडी आपल्याच ताब्यात ठेवली होती.

हेही वाचा-अँटिलिया प्रकरण: एनआयएकडून आणखी काही पोलिस अधिकाऱ्यांना आज होवू शकते अटक

स्कॉर्पिओ मनसुख हिरेन यांची असल्याने त्यांच्या मागे चौकशीचा ससेमिरा लागला. त्यातच त्यांची हत्या झाल्याचे समोर आले. त्यानंतर हे प्रकरण वेगळ्याच वळणावर गेले. तपास एनआयएकडे गेला. हिरेन यांच्या पत्नीने काही धक्कादायक माहिती पोलीसांना दिली. गेल्या काही महिन्यापासून संबधित स्कॉर्पिओ ही सचिन वाझेच वापरत असल्याचे त्यांनी सांगितले. ही गाडी त्यामुळे हिरेन हत्या आणि अँटिलिया प्रकरणात थेट सचिन वाझे यांचे नाव घेतले जावू लागले. शिवाय ही स्कॉर्पिओ ते ठाण्यातही वापरत असल्याचा आरोप होवू लागल. विरोधी पक्षनेते देवेंद्र फडणवीस यानंतर या कटाचे मुख्य सुत्रधार वाझेच असल्याचा आरोप केला. सध्या वाझे यांना एनआयएने अटक केली असून त्यांची चौकशी सुरू आहे."

"ती" पांढरी इनोव्हा कार पोलिसांचीच?

स्कॉर्पिओ कार अंबानींच्या घरी पार्क करत असताना त्याच वेळी तिथे एक इनोव्हा कारही होती. त्याच कारमधून पुढे स्कॉर्पिओचा चालक बसून पुढे गेला. ती कार कोणाची याचा शोध सुरू झाला. तपासात सीसीटीव्ही फुटेज तपासण्यात आले. त्यातही धक्कादायक माहिती पुढे आली. ही इनोव्हा कार क्राईम ब्रांचच्या इंटेलिजन्स युनिटची असल्याचे समोर आले. याच युनिटमध्ये वाझे हे कार्यरत होते. या कारचा एनआयए शोध घेत होती त्यावेळी ही कार मुंबई पोलिसांच्या मेंटेनन्स डिपार्टमेंटमध्ये सापडली. घटनेनंतर या इनोव्हाला पोलिसांच्या मोटार ट्रान्सपोर्ट विभागात रिपेअरिंगसाठी पाठवण्यात आल्याचे समोर आले. ही कार पोलीस मुख्यालयातही पाहिली गेली होती. शिवाय अंबानी यांच्या घराबाहेर स्कॉर्पिओ बरोबरही हीच कार असल्याचा एनआयएला संशय आहे. त्यामुळे वाझे यांच्यावरील संशय आणखीनच गडद झाला.

हेही वाचा- अँटिलिया प्रकरण: एनआयएकडून आणखी काही पोलीस अधिकाऱ्यांना आज होवू शकते अटक

दोन कारनंतर मर्सडीजची इंट्री

मनसुख हिरेन यांची हत्या होण्याआधी त्यांना सीएसएमटीला पहाण्यात आले. सीएसएमटी स्थानकाबाहेर मनसुख हिरेन कोणाची तरी वाट पाहत असल्याचे सीसीटीव्ही फुटेज एनआयएच्या मिळाले. तेवढ्यात एक मर्सडिज कार येते आणि मनसुख हिरेन त्या कारमध्ये बसून जाताना सीसीटीव्हीत दिसत आहेत. यानंतरच हिरेन गायब झाल्याचा संशय एनआयएला आहे. त्यामुळे ही कार तपासात महत्वाची भूमिका बजावणार आहे. ही कार मंगळवारी रात्री एनआयएने दक्षिण मुंबईतून ताब्यात घेतली असून गाडीत ५ लाख रूपये, पैसे मोजण्याचे मशिन काही कपडे सापडले आहेत. ही गाडी धुळ्याची असल्याची चर्चा आहे. शिवाय ही गाडीही वाझेच वापरत होते, असे एनआयएच्या सुत्रांकडून समजत आहे. त्यामुळे वाझे यांची या प्रकरणात नक्की काय भूमिका होती हे उलघडण्याचे आवाहन एनआयए समोर आहे.

तीन कार आणि वाझे

सध्याच्या स्थितीत या तीनही कार बरोबर वाझेंचा कुठेना कुठे संबध आलेला दिसून येत आहे, असे एनआयएच्या सुत्रांचे म्हणणे आहे. त्यामुळे कारचा कापर कसा कसा आणि कुठे कुठे करण्यात आला याचा शोध एनआयएला घ्यावा लागणार आहे. त्यामुळे या तीन कार ही केस सोडवण्यात महत्वाची भूमिका बजावू शकतात.