मुंबई - कोरोना रुग्णांच्या उपचारासाठी वापरण्यात येणाऱ्या रेमडेसिवीर इंजेक्शनचा राज्यातच नव्हे तर देशात मोठा तुटवडा आहे. राज्याला दररोज अंदाजे 60 लाख इंजेक्शनची गरज असताना आजही केवळ दिवसाला 36 ते 37 हजार इंजेक्शन उपलब्ध होत आहेत. केंद्र सरकारने 21 एप्रिल ते 9 मे दरम्यान राज्याला 8 लाख 9 हजार इंजेक्शनचा साठा दिला आहे. त्यानुसार आतापर्यंत यातील 3 लाख 85 हजार 401 इंजेक्शन मिळाले आहेत. तर अजून अंदाजे 3 लाख 25 हजार इंजेक्शनची प्रतीक्षा आहे. हा साठा पुढील सहा दिवसांत मिळायला हवा अशी माहिती अन्न आणि औषध प्रशासनातील (एफडीए) एका वरिष्ठ अधिकाऱ्याने दिली आहे. एकूणच 19 दिवसांच्या हिशोबाने राज्याला दिवसाला 36 ते 37 हजार इंजेक्शन उपलब्ध होत आहेत. त्यामुळे आजही किमान 20 हजार इंजेक्शन अपुरे पडत आहेत.
...तरीही डॉक्टरांकडून इंजेक्शनचा वापर
कोरोनावर अजूनपर्यंत औषध मिळालेले नाही. असे असताना गंभीर रुग्णांसाठी वर्षभरापासून इतर आजारावरील रेमडेसिवीर इंजेक्शन वापरले जात आहे. याचा फायदा गंभीर रुग्णांना होत असल्याचे डॉक्टर म्हणतात. पण, वैद्यकीय संस्था, आयसीएमआर आणि तज्ज्ञांनी मात्र हे इंजेक्शन फायद्याचे नाही. यामुळे रुग्णांचा जीव वाचत नाही. तेव्हा विनाकारण हे इंजेक्शन वापरू नका, नातेवाईकांचे हाल इंजेक्शन मिळवण्यासाठी करू नका, असे सांगितले आहे. त्यातही आता ही सर्व परिस्थिती लक्षात घेता आणि इंजेक्शनचा तुटवडा पाहता इंजेक्शन विचारणासाठी महत्वाचा निर्णय घेण्यात आला आहे. तो म्हणजे आता मुंबईत पालिकेला आणि इतर जिल्ह्यात जिल्हाधिकाऱ्यांना ठराविक साठा दिवसाला दिला जात आहे. तर रुग्णालयाच्या मागणीनुसार उपलब्ध साठा जिल्हाधिकाऱ्यांकडून रुग्णालयाना वितरित केला जात आहे. आता या इंजेक्शनची आधी प्रमाणे वितरक किंवा होलसेलर, मेडिकल विक्रेते यांच्याकडून विक्री होत नाही. असे असताना ही अनेक डॉक्टर इंजेक्शन लिहून देत ते आणून देण्यासाठी नातेवाईकांचा पिच्छा पुरवत असल्याचे चित्र आहे. अशा अनेक तक्रारी समोर येत आहेत. इंजेक्शनसाठी आजही नातेवाईक वणवण करत आहेत. तेव्हा डॉक्टरांनी मुळात इंजेक्शन खूपच गरज असले तरच वापरावे, असे आवाहन पुन्हा एकदा केले आहे.
थोडासा दिलासा
राज्यात आजच्या घडीला 6 लाख 56 हजार रुग्ण सक्रिय आहेत. यातील 10 टक्के रुग्ण गंभीर असून यातील किमान 90 टक्के रुग्णांना रेमडेसिवीर लागते. त्यामुळे आजही राज्यात दिवसाला किमान 60 हजार इंजेक्शनची मागणी असते. पण, पुरवठा मात्र 36 ते 37 हजार इतकाच होतो. आजही किमान 20 हजार इंजेक्शनची टंचाई आहे. मात्र, मागील 10 दिवसांत थोडा का होईना पण राज्याला दिलासा मिळाला आहे. कारण 10 दिवसांपूर्वी राज्याला 25 ते 30 हजार दरम्यान इंजेक्शन दिवसाला उपलब्ध होत होते. मात्र आता केंद्राने साठा काहीसा वाढवला आहे. त्यामुळे सध्या दिवसाला 36 ते 37 हजार इंजेक्शन उपलब्ध होत आहेत. केंद्र सरकारने 21 एप्रिल ते 9 मे दरम्यान 8 लाख 9 हजार इंजेक्शनचा साठा पुरवण्याचे आदेश देशातील सात कंपन्यांना दिले आहेत. त्यानुसार आतापर्यंत 3 लाख 85 हजार 401 इंजेक्शन मिळाले आहेत. अजून 3 लाख 25 हजार इंजेक्शन येणे बाकी आहे. तर आता 9 मेनंतर राज्याला किती साठा मिळतो हे पाहणे महत्वाचे आहे.
ऑक्सिजनचा पुरवठा वाढवण्यासाठीच्या प्रयत्नांना यश..!
राज्यात आता कोरोना रुग्ण संख्या काहीशी कमी होत आहे. पण, सक्रिय रुग्ण आहेत तितकेच आहेत. त्यामुळे आजही राज्याला दिवसाला 1700 मेट्रिक टनहून अधिक ऑक्सिजन लागत आहे. राज्यातून 1 हजार 270 मेट्रिक टनची मागणी पूर्ण होत आहे. तर उर्वरित साठा पुरवण्यासाठी एफडीएने इतर राज्यांची मदत घेतली असून अन्य ही पर्याय शोधले आहेत. एफडीएच्या या प्रयत्नांना यश येताना दिसत आहे. त्यामुळेच किमान 1 हजार 650 मेट्रिक टनचा पुरवठा दिवसाला होत आहे. अंदाजे मेट्रिक टनचा तुटवडा जाणवत आहे. 2 मे रोजी राज्यात 1 हजार 687 मेट्रिक टन ऑक्सिजन पुरवण्यात आला आहे. यातील 247.47 मेट्रिक टन ऑक्सिजन हा परराज्यातून मिळाला आहे. तर 3 मे रोजी 1 हजार 632.20 मेट्रिक टन ऑक्सिजन पुरवण्यात आला आहे. एकूण आता ऑक्सिजनचा साठा बऱ्यापैकी वाढत असून यापुढे तो आणखी वाढवण्याचे एफडीएचे प्रयत्न असणार आहेत.
हेही वाचा - आधारविना भटके-विमुक्त लसीकरणापासून वंचित राहणार? मुनींप्रमाणे विमुक्तांसाठी अटी शिथील होणार का?
