'क्यार' व 'महा' चक्रीवादळातील नुकसानग्रस्त मच्छिमारांना मिळणार विशेष आर्थिक सहाय्य

'क्यार' व 'महा' या दोन चक्रीवादळामुळे मच्छिमारांना मासेमारी न करता आल्याने नुकसान झाले होते. या नुकसानीबद्दल ६५ कोटी १७ लाख इतके विशेष सानुग्रह अनुदान देण्याचा निर्णय आज झालेल्या मंत्रिमंडळ बैठकीत घेण्यात आला आहे.

मुंबई- अरबी समुद्रात निर्माण झालेल्या 'क्यार' व 'महा' या दोन चक्रीवादळामुळे मच्छिमारांना मासेमारी न करता आल्याने नुकसान झाले होते. या नुकसानीबद्दल ६५ कोटी १७ लाख इतके विशेष सानुग्रह अनुदान देण्याचा निर्णय आज झालेल्या मंत्रिमंडळ बैठकीत घेण्यात आला आहे.

रापणकार संघाचे सभासद असणाऱ्यांना प्रति सभासद १० हजार रुपये, असे ४ हजार १७१ सभासदांना ४ कोटी १६ लाख, बिगर यांत्रिक नौकाधारकांना प्रत्येकी २० हजार प्रमाणे १ हजार ५६४ नौकाधारकांना ३ कोटी १२ लाख ८० हजार, १-२ सिलेंडर नौकाधारकांना प्रत्येकी २० हजार रुपये प्रमाणे ४ हजार ६४१ जणांना ९ कोटी २८ लाख २० हजार, ३-४ सिलेंडर नौकाधारकांना प्रत्येकी ३० हजार प्रमाणे १ हजार ५२६ जणांना ४ कोटी ५७ लाख ८० हजार, ६ सिलेंडर नौकाधारकांना प्रत्येकी ३० हजार रुपये प्रमाणे ७ हजार ६७१ जणांना २३ कोटी १ लाख ३० हजार रुपये, लहान मासळी विक्रेता मच्छिमारांना ५० लि. क्षमतेच्या २ शितपेट्या पुरवठा प्रत्येकी ३ हजार प्रमाणे ३५ हजार जणांना २१ कोटी रुपये देण्यात येतील. याचा लाभ ५४ हजार ५७३ मच्छिमारांना मिळेल. हा लाभ थेट त्यांच्या बँक खात्यांमध्ये (डीबीटी) जमा करण्यात येईल.

मालेगाव तालुक्यात कृषी विज्ञान संकूल

नाशिक जिल्ह्यातील मालेगाव तालुका येथील मौजे काष्टी येथे कृषी विज्ञान संकूल देण्याचा निर्णय आज झालेल्या मंत्रिमंडळ बैठकीत घेण्यात आला. या संकुलात शासकीय कृषी महाविद्यालय, उद्यानविद्या महाविद्यालय, अन्न तंत्रज्ञान महाविद्यालय, कृषी व्यवसाय व्यवस्थापन महाविद्यालय आणि कृषी अभियांत्रिकी व तंत्रज्ञान महाविद्यालय स्थापन करण्यात येईल.

२०२०-२१ या शैक्षणिक वर्षापासून कृषी व्यवसाय व्यवस्थापन अभ्यासक्रम सुरू करण्यास, तसेच यासाठी शिक्षक तसेच शिक्षकेत्तर अशा ७६ पदांना देखील मान्यता देण्यात आली. त्याचबरोबर, अन्न तंत्रज्ञान महाविद्यालय अभ्यासक्रम देखील सुरू करण्यात येईल. या सर्वांसाठी ७० कोटी रुपये खर्च येईल.

शहरी भागासाठी आरोग्य सेवा संचालकांचे पद

राज्यातील शहरी भागासाठी आरोग्य सेवा संचालकांचे, तसेच इतर ६ पदे निर्माण करण्याचा निर्णय आज झालेल्या मंत्रिमंडळ बैठकीत घेण्यात आला. शहरी भागासाठी संचालक, आरोग्य सेवा (शहरी), २ उप संचालक पदे, ४ सहाय्यक संचालक पदे, अशी ही नवी यंत्रणा असेल. राज्यातील शहरी भागामध्ये लसीकरण, साथ रोग व इतर आरोग्यविषयक कार्यक्रम अधिक परिणामकारकतेने राबविण्यासाठी, तसेच स्थानिक स्वराज्य संस्थांना मार्गदर्शन करण्यासाठी ही यंत्रणा कार्यरत राहील.

हेही वाचा- मेट्रो-1 ठरतेय एमएमओपीएलसाठी 'पांढरा हत्ती'; लॉकडाऊनमध्ये दुप्पट नुकसान