मुंबई - सांताक्रूज येथील पटेल नगर येथे पाणी भरल्याने काल विजेचा धक्का लागून माय लेकाचा मृत्यू झाला होता. या कुटुंबियाला भेटायला महापौर गेले असता स्थानिक लोकांनी घेराव घालून त्यांना वाटेतच अडवले.
महापौर विश्वनाथ महाडेश्वर यांना घेराव घालताना स्थानिक
सांताक्रूझ येथील वाकोला पोलीस ठाण्याच्या हद्दीत पटेल नगर येथील माला नगम (५०) व संकेत नगम (२२) या माय लेकाचा विजेचा धक्का लागून मृत्यू झाला होता. या घटनेनंतर येथील संतप्त रहिवाशांनी अडाणी इलेक्ट्रिकलला जाब विचारण्यासाठी वेस्टर्न एक्सप्रेस हायवेवर रास्ता रोको केला होता. घटनेची माहिती मिळाल्यावर महापौर विश्वनाथ महाडेश्वर यांनी स्थानिक आमदार तृप्ती सावंत आणि स्थानिक नगरसेवकासह मृतांच्या नातेवाईकांना भेट देण्याचा प्रयत्न केला. मात्र रहिवाशांनी महापौरांना रस्त्यावरच अडवले. रस्त्यावर तब्बल पावणे दोन तास हा गोंधळ सुरू होता.
