मुंबई - सलग १८ तास अभ्यास करून भारतरत्न डॉ. बाबासाहेब आंबेडकरांच्या १२८ व्या जयंतीनिमित्त त्यांना अभिवादन करण्यात येत आहे. शनिवारी पहाटे ६ वाजल्यापासून माटुंग्यातील वीरमाता जिजाबाई तंत्रज्ञान संस्था (व्हीजेटीआय) या नामांकित अभियांत्रिकी महाविद्यालयात विद्यार्थ्यांनी अभिवादनाला सुरुवात केली आहे. या ठिकाणी मध्यरात्री १२ पर्यंत अभ्यास सुरू राहणार आहे. १५० हुन अधिक विद्यार्थी या ठिकाणी उपस्थित असून ५० विद्यार्थ्यांनी या अभिवादनामध्ये सहभाग घेतला आहे.
या अभियानामध्ये कॉम्पुटर, इलेक्ट्रॉनिक डिप्लोमा, डिग्री, पीएचडी, अशा ९ विभागातील विद्यार्थ्यांनी सहभाग घेतला आहे. विशेष म्हणजे विद्यार्थ्यांबरोबर शिक्षकही या अभियानात सहभागी झाले आहेत. तसेच प्रा. डॉ. बी. बी. मेश्रामही यावेळी १८ तास संविधान या विषयावर अभ्यास करत आहेत. मेश्राम हे १९९३ पासून व्हीजेटीआयमध्ये कार्यरत आहेत. विद्यार्थ्यांबरोबर अभ्यास करून छान वाटत आहे. बाबासाहेबांनी खूप कष्ट करून सर्वाना दिशा दाखवली. त्यांच्याकडील काही गुण युवापिढीने घेणे अपेक्षित असल्याचे मेश्राम यांनी यावेळी सांगितले.
शैक्षणिक जीवनात बाबासाहेब सलग १८ तास अभ्यास करत असत. त्यामुळेच त्यांच्या जयंतीनिमित्त हा उपक्रम राबविण्यात आला आहे. मुलांमध्ये अभ्यास करण्याची क्षमता, सामाजिक बांधिलकी वाढावी, हा या अभियानामागचा उद्देश आहे. त्याबरोबरच पुढील वेळी यापेक्षा जास्त विद्यार्थ्यांना सहभागी करणार असल्याचे प्राध्यापक डॉ. वा. भि. निकम यांनी सांगितले. तर या अभियानामुळे माझ्यात अभ्यास करण्याची किती क्षमता आहे, हे समजेल, असे विद्यार्थी अक्षदा खाटेकर याने सांगितले.
या अभिवादनाच्या कार्यक्रमासाठी महाविद्यालयाच्या संगणक विभागाचे वा. भि. निकम, डॉ. सुषमा वाघ, डॉ. अभय बाम्बोळे आणि ग्रंथालयातील कर्मचारी जी. डी. मालवणकर यांचे सहकार्य लाभले.
