मुंबई : पर्यटन व्यवसायाला चालना देण्यासाठी मागील दोन वर्षानंतर आता पुन्हा एकदा हा व्यवसाय जोर धरताना दिसत आहे. यासाठी मुंबईमध्ये आशियातील सर्वात मोठे ओटीएम मुंबई हे प्रदर्शन सुरू झाले असून ते 4 फेब्रुवारी पर्यंत चालणार आहे. यामध्ये देश विदेशातून हजारोंच्या संख्येने पर्यटन व्यवसायातील मतभर सहभागी झाले आहे. या व्यवसायाला चालना देण्यासाठी तसेच याची माहिती सामान्य लोकांपर्यंत पोहोचवण्यासाठी इथे उपलब्ध आहेत. देश विदेशातील स्टॉलमध्ये हैदराबाद येथील रामोजी फिल्म सिटी यांचा स्टॉल आकर्षणाचा केंद्रबिंदू ठरत आहे. वन स्टॉप डेस्टिनेशन म्हणायचे झाले तर रामोजी फिल्म सिटी नजरेसमोर येत असे इथे भेट देणारे हौशी पर्यटक सांगत आहेत.
हैदराबाद रामोजी फिल्मसिटी एक समीकरण : याविषयी बोलताना पर्यटक मयूर गायकवाड म्हणतात की, हैदराबाद म्हटले की, रामोजी फिल्म सिटीला भेट देणे फार गरजेचे आहे. कारण हैदराबाद, रामोजी फिल्म सिटी हे आता एक समीकरणच बनलेल आहे. इथे विविध प्रकारचे सेट बघायला भेटतात. एक दिवसाचा पूर्ण सहकुटुंब करमणुकीचा कार्यक्रम सुद्धा येथे होतो. लहान मुलांपासून, मोठ्यांसाठी अनेक प्रकारचे कर्मणुकीचे कार्यक्रम इथे आहेत. इथे विविध प्रकारचे झोन सुद्धा आहेत. इथे पोचण्यासाठी विविध विभागातून बस सर्विस सुद्धा उपलब्ध आहे. बाहुबली सारख्या चित्रपटाची शूटिंग सुद्धा रामोजी फिल्मसिटीमध्ये झाली असून, इथले फिल्मीसेट बघण्यासारखे आहेत. एकंदरीत रामोजी फिल्म सिटी बघणे म्हणजे, एक स्वप्नच पूर्ण करण्यासारखे असते, असंही मयूर गायकवाड सांगतात.
रामोजी फिल्मसिटीचे विविध रंग : रामोजी फिल्मसिटी हे विश्रांती आणि मनोरंजनाचे प्रसिद्ध केंद्र आहे. थीमॅटिक हॉलिडे डेस्टिनेशन ते सिनेमॅटिक आकर्षणे, परस्परसंवादी मनोरंजन, दैनंदिन लाइव्ह शो, लाइव्हवायर स्टंट्स, राइड्स, गेम्स आणि मुलांसाठी अनेक आकर्षण केंद्र इथे आहेत. इथे प्रत्येक बजेटला अनुरूप स्टुडिओ टूर, इको टूर, फूड, शॉपिंग आणि हॉटेल्स ऑफर आहेत. वर्षभर आयोजित केल्याजाणाऱ्या विविध कार्यक्रमांमध्ये विंटर फेस्ट, न्यू इयर सेलिब्रेशन, हॉलिडे कार्निव्हल, फेस्टिव्ह सेलिब्रेशन-दसरा ते दिवाळी इत्यादींचा समावेश इथे होतो. सिनेमा-जादूची भूमी असल्याने कौटुंबिक सुट्ट्या मजेत घालवण्यासाठी, तसेच भव्य विवाहसोहळ्यांसाठी हे एक उत्कृष्ट गंतव्यस्थान आहे. हनीमून, अनुभवात्मक कॉर्पोरेट कार्यक्रम, शाळा आणि कॉलेज सहल, उत्सव, साहस आणि निरोगीपणा यासाठी सर्व स्तरावर ही फिल्मसिटी उपलब्ध आहे.
अनेक कुटुंब दोन वर्ष करमणुकीपासून दूर : ओटीएममध्ये रामोजी फिल्म सिटीच्या असलेल्या स्टॉल बद्दल बोलताना रामोजी फिल्म सिटीचे मार्केटिंगचे वरिष्ठ महाव्यवस्थापक टी.आर. एल. राव सांगतात की, आम्हाला आनंद आहे की, मुंबई ओटीएममध्ये आमच्या स्टॉलचा समावेश झालेला आहे. हे एक वन स्टॉप डेस्टिनेशन आहे. जिथे सर्व काही उपलब्ध आहे. आम्ही इथे येणाऱ्या लोकांना फिल्मसिटी बाबत व्यवस्थित समजावून सांगतो. अनेक जणांना बरीच माहिती पूर्वीपासून असतेच, परंतु इथे आल्यानंतर ते विविध प्रकारची चौकशी करतात. फक्त डेस्टिनेशन प्रमोशन नाही, तर शाळा, कॉलेज, समर कॅम्प याबाबत सुद्धा येथे विविध प्रकारचे पॅकेज उपलब्ध असल्याकारणाने त्या पद्धतीची सुद्धा ते आवर्जून चौकशी करतात. आम्ही त्यांना त्यांच्या योग्य बजेटमध्ये उपलब्ध असलेली माहिती देतो. वास्तविक कोवीड 19 महामारीनंतर आता हा व्यवसाय पुन्हा एकदा मार्गावर येत आहे. अनेक कुटुंब दोन वर्ष करमणुकीपासून दूर राहिली आहेत. परंतु आता पुन्हा कुटुंबाला एकत्र येण्याची मजा करण्यासाठी, वेळ घालवण्यासाठी रामोजी फिल्म सिटी सारख्या जागेचा शोध असतो. रामोजीच्या नावातच फिल्म सिटी असल्याकारणाने येथे अनेक चित्रपटांची शूटिंग झाली असून बाहुबली, आरआरआर या चित्रपटाची शूटिंग, असे एक ना अनेक चित्रपटाच्या शूटिंग येथे झाल्या आहेत. ते सेट पाहायला सुद्धा आज लोकांची गर्दी येथे होते.
स्टॉलला उदंड प्रतिसाद : याबाबत बोलताना रामोजी फिल्म सिटीचे सेल्स, मार्केटिंगचे व्यवस्थापक तुषार गर्ग सांगतात की, आज दुपारपर्यंतच ओटीएम मुंबई ट्रॅव्हल ट्रेड शो मध्ये 100 ते 150 लोक आम्हाला भेटले. त्यांनी रामोजी फिल्मसिटी विषयी चौकशी केली. अनेक वर्षानंतर मुंबईत येण्याचा योग आला असून देशभरातून ट्रॅव्हल एजंट इथे येत आहेत. लग्न असेल, हनिमून असेल, टूर पॅकेज असेल, विविध प्रकारच्या चौकशी केल्या जात असून आम्ही योग्य त्या प्रकारची माहिती त्यांना देत असून हवे तसे सहकार्य आम्हालाही भेटत आहे. ही एक आनंदाची बाब असल्याचंही गर्ग यांनी सांगितले आहे.
हेही वाचा - Outbound Travel Mart Show : ओटीएम मुंबई ट्रॅव्हल ट्रेड शोचे आयोजन; रामोजी ग्रुपचाही सहभाग
