मुंबई : नव्या तपास अहवालावर सीबीआय तीन आठवड्यांत भूमिका स्पष्ट करणार असल्याची माहिती मिळत आहे. खटल्यातील आरोपींच्यावतीने याप्रकरणी आता हायकोर्टाची देखरेख संपवण्याकरिता याचिका दाखल केली आहे.
सीबीआय आपली भूमिका स्पष्ट करणार : डॉ. नरेंद्र दाभोलकर हत्या प्रकरणाचा तपास पूर्ण झाला आहे. या प्रकरणाचा तपास नव्यान सुरू करण्यात आला होता. तोसुद्धा पूर्ण झाला आहे. याचा अहवाल तपास अधिकाऱ्यांनी दिल्लीतील सीबीआय मुख्यालयात पाठवला आहे. येत्या तीन आठवड्यांत सीबीआय आपली भूमिका स्पष्ट करणार असल्याची माहिती सीबीआयच्या वतीने अतिरिक्त सॉलिसिटर अनिल सिंग यांनी मुंबई उच्च न्यायालयात दिली.
दाभोलकर प्रकरणी १५ साक्षीदारांची साक्ष : आज ( ३० जानेवारी ) उच्च न्यायालयाचे न्यायमूर्ती अजय गडकरी आणि न्यायमूर्ती प्रकाश नाईक यांच्या खंडपीठसमोर सुनावणी पार पडली. तेव्हा अनिल सिंग यांनी सांगितले की, डॉ. नरेंद्र दाभोळकर हत्या प्रकरणाचा तपास पूर्ण झाला आहे. ३२ पैकी १५ साक्षीदारांची साक्ष नोंदवण्यात आली आहे. याप्रकरणी आणखी तपास करण्याची गरज नाही. दिल्लीतील सीबीआय मुख्यालयात तपासाचा अहवाल पाठवण्यात आला आहे. यावर तीन आठवड्यात सीबीआय आपला निर्णय जाहीर करेल, असे सिंग यांनी सांगितले.
याला वकिलाचा विरोध : डॉ. दाभोळकर हत्याकांडाच्या तपासाप्रकरणी आरोपपत्र दाखल झाले असून, पुणे सत्र न्यायालयात खटला सुरू आहे. त्यामुळे उच्च न्यायालयाने तपासावर आता देखरेख ठेऊ नये, अशी मागणी आरोपी शरद कळसकर आणि विक्रम भावे यांनी न्यायालयात केली. याला दाभोलकर कुटुंबीयांचे वकील अभय नेवगी यांनी विरोध दर्शवला. दाभोलकर हत्या प्रकरणातील काही आरोपी अद्यापही फरार आहेत. हत्येसाठी वापरलेली दुचाकी आणि हत्यार सापडलेले नाही. हत्येचे कारण समोर आले नसून, सूत्रधारचा शोध लागला नाही. त्यामुळे याप्रकरणात उच्च न्यायालयाची देखरेख आवश्यक आहे, असे नेवगी यांनी म्हटले आहे.
