मुंबई - मुलुंड पूर्व येथील केळकर कॉलेजच्या पाठीमागे ओसाड जागेत २८ जानेवारीला विजय किशोर यादव या व्यक्तीचा खून झाला होता. यावेळी मृतदेहाचा चेहरा जाळून गुन्ह्यातील पुरावा नष्ट करण्यात आला होता. दरम्यान, खून झालेल्या व्यक्तीच्या मृतदेहाची ओळख पटवण्यासाठी मुलुंडमधील नवघर पोलिसांना तब्बल ४ महिने लागले.
या प्रकरणात नवघर पोलिसांनी योगेश एकनाथ राणे (वय ३३ वर्षे) यास अटक केली आहे. दरम्यान, मुलुंडमध्येच एका नेपाळी माणसावर झालेल्या हल्ल्याच्या घटनेसंदर्भातील तपासादरम्यान नवघर पोलिसांनी आरोपीस अटक केली आहे.
पहिल्या घटनेत मुलुंड येथे २८ जानेवारीला व्यायाम काढण्याच्या लोखंडी दंभेलच्या क्षुल्लक कारणावरून आरोपी योगेश राणे आणि विजय या दोघांमध्ये वाद झाला होता. या वादातून राणे याने विजय यास नशा करून मुलुंडच्या केळकर कॉलेजच्या पाठीमागील अडगळीत जागेत घेऊन गेला. तिथे त्याने विजयवर दगड व टणक वस्तूंनी हल्ला करून त्याचा खून केला. त्यानंतर मृतदेहाची ओळख पटू नये यासाठी चेहरा जाळला.
या घटनेनंतर एप्रिल महिन्यात २९ तारखेला त्याच ठिकाणी आणखी एका नेपाळी व्यक्तीवर अशाच प्रकारे हल्ला करून जीवे मारण्याचा प्रयत्न करण्यात आला होता. या हल्ल्यात जखमी झालेल्या व्यक्तीचे नाव नौराज रेगमी (३०) असल्याचे नवघर पोलिसांना कळाले. तर हा गुन्हा त्याचाच सहकारी योगेश राणे याने केल्याचे उघड झाले होते. त्यामुळे नवघर पोलिसांनी हत्येचा प्रयत्न केल्याप्रकरणी गुन्हा दाखल करून चेंबूर घाटला येथून योगेश राणेला अटक केली होती.
योगेश राणे आणि जखमी नौराज रेगमी हे दोघे मुलुंड पश्चिम रेल्वे स्थानकाजवळ असणार्‍या विश्वभारती या हॉटेलात कामाला होते. योगेश हा हॉटेलमध्ये चहा बनवण्याचे काम करीत होता. तर नवराज हा टेबल बॉय म्हणून काम करीत होता. या हॉटेलमध्ये टेबल बॉय म्हणून काम करणारा विजय किशोर यादव हा जानेवारीपासून बेपत्ता असल्याचे पोलिसांच्या तपासात उघड झाले.
घटनास्थळ तसेच दोन्ही गुन्ह्यातील मारण्याच्या पद्धतीवरून जानेवारीत मिळून आलेला मृतदेह विजयचा असावा हा संशय पोलिसांना आला. त्यामुळे पोलिसांनी त्या अनुषंगाने तपास सुरु केला. त्यानुसार पोलिसांनी विश्वभारती हॉटेल व्यवस्थापकाकडे त्यांच्या हॉटेलात काम करणारा नोकर बेपत्ता झाल्याप्रकरणी चौकशी केली. यावेळी हॉटेल व्यवस्थापकाने सांगितले, की आमच्याकडे दररोज अनेक कामगार येतात. त्यांना पटले नाही तर ते काम सोडून निघून जातात. विजय हा देखील तसाच काम सोडून गेला असेल. म्हणून आम्ही तक्रार केली नाही, असे हॉटेल व्यवस्थापकाने उत्तर दिल्याचे परिमंडळ ७ चे पोलीस उपायुक्त अखिलेश कुमार सिंग यांनी सांगितले.
मृतदेहाची ओळख पटवण्यासाठी चेहर्‍याची पुनर्निर्मिती करण्यात आली
मृत विजय यादव याच्या खूनाचे पुरावे नष्ट करण्याच्या हेतूने आरोपीने मृतदेहाचा चेहरा जाळला होता. त्यामुळे मार्च महिन्यात नवघर पोलिसांनी मृतदेहाची ओळख पटवण्यासाठी केईएम हॉस्पिटलमधील ऑस्टिओलॉजी विभागाची मदत घेतली. तेथील डॉक्टरांनी मृत व्यक्तीच्या चेहर्‍याची पुनर्निर्मिती करून त्या व्यक्तीचा चेहरा पूर्वीच्या चेहर्‍याशी मिळता जुळता तयार केला होता. मात्र, तरीही मृताची ओळख पटत नाही. दरम्यान, नौराज रेगमी याने हा चेहरा विजयचा असून तो हॉटेलमध्ये काही दिवस कामाला होता, असे आपल्या जबाबात सांगितले.
विजय यादव हा मूळचा उत्तर प्रदेशचा असल्यामुळे त्याचा भाऊ रामकिशोर यादव यास पोलिसांनी मुंबईत बोलावून घेतले. त्यानंतर मृतदेहाचे आणि रामकिशोरची डीएनए चाचणी करण्यात आली. अखेर गेल्या आठवड्यात डीएनएचा अहवाल पोलिसांच्या हाती आला. त्यात विजयच्या भावाची आणि मृतदेहाचे डीएनए जुळल्याने मृतदेहाची ओळख पटण्यास पोलिसांना मदत मिळाली.
दरम्यान, नौराज रेगमी याच्यावर जीवघेण्या हल्ला केल्याप्रकरणी योगेश राणे हा तळोजा जेलमध्ये होता. तेथून विजयच्या खुनाच्या गुन्ह्यात पोलिसांनी त्याला अटक केली. दरम्यान, याआधीही योगेशने श्रीवर्धन येथे गुन्हा केल्याचे पोलीस तपासात आढळून आले आहे.
