मुंबई- अमेरिकी नागरिकांना लुबाडणाऱ्या शहरातील कॉल सेंटरवर पोलिसांनी धाड टाकली आहे. या कॉल सेंटरच्या माध्यमातून भारतात प्रतिबंधित औषधींना अमेरिकी नागरिकांना विकण्याच्या नावाखाली त्यांना लुटले जायचे. या गुन्ह्यात समावेश असलेल्या दोन आरोपींना क्राईम ब्रांच युनिट १० च्या पथकाने अटक केली आहे.
गेल्या काही दिवसांपासून शहरातील मरोळ परिसरात असलेल्या ए.एम कॉल कनेक्ट या कॉल सेंटर कंपनीच्या माध्यमातून अमेरिकेतील ग्राहकांशी संपर्क साधला जात होता. यावेळी कॉल सेंटरमधील व्यक्ती ही स्वतःला अमेरिकन नागरिक असल्याचे सांगून अमेरिकेतील नागरिकांना वायग्रा, सियलीस, लिव्हेट्रो यासारख्या प्रतिबंधित औषध स्वस्तात विकण्याचे आमिष द्यायचे व ऑनलाईन ऑर्डर घेऊन त्यांच्याकडून पैसे लुबाडायचे.
पोलिसांनी या कॉलसेंटरवर धाड मारली असता त्या ठिकाणी २२ व्यक्ती हे संगणकाला जोडलेला हेडफोन माईकवरुन विओआयपी ऑटो डायलच्या माध्यमातून अमेरिकेतील नागरिकांशी संपर्क साधत होते. आणि औषध विक्रीच्या बहाण्याने त्यांच्याकडून डॉलरमध्ये पैसे घेत होते. पोलिसांनी घटनास्थळावरून राऊटर, सर्वर कनेक्टर, संगणक, माईक, मोबाइल असे साहित्य जप्त केले आहे. या प्रकरणी कॉल सेंटरचा चालक मुद्दसर मकानदार व चालक अ‌ॅशले डीसुजा या दोन आरोपींना अटक करण्यात आली आहे. न्यायालयात या आरोपींना हजर केले असता न्यायालयाने दोन्ही आरोपींना २१ जानेवारीपर्यंत पोलीस कोठडी सुनावली आहे.
हेही वाचा- 'भारताच्या इतिहासात इंग्रजांना मोठं करण्याचा सैफ अली खानचा प्रयत्न'
