​​Pandharpur: वाराणसीच्या धर्तीवर पंढरपूरचा विकास करणार, कोणालाही वाऱ्यावर सोडणार नाही -मुख्यमंत्री

वारकऱ्यांचे श्रद्धास्थान असलेल्या पंढरपूर मंदिराचे वाराणसीच्या धर्तीवर विकास करण्यात येणार आहे. पंढरपुरात येणाऱ्या भाविकांना व स्थानिक नागरिकांना पायाभूत सुविधा मिळाव्यात यादृष्टीने प्रस्तावित तीर्थक्षेत्र विकास आराखड्यांतर्गत नव्याने कामे समाविष्ट केली आहेत. (Pandharpur will be developed ) या विकास कामात ऐतिहासिक व पुरातन वास्तूचे जतन करुन कामे केली जातील. तसेच लोकप्रतिनिधी, स्थानिक नागरिक, व्यापारी, वारकऱ्यांना विश्वासात घेऊनच तीर्थक्षेत्र विकास आराखडा तयार केला जाईल. कोणालाही वाऱ्यावर सोडणार नाही, अशी मुख्यमंत्री एकनाथ शिंदे यांनी विधानपरिषदेत दिली.

मुंबई - पंढरपूर तीर्थक्षेत्र विकास आराखडा कॉरीडोरबाबत आमदार अमोल मिटकरी यांनी लक्षवेधी सूचना मांडली होती. महाविकास आघाडीच्या नेत्यांनी पंढरपूर मंदिर परिसरातील समस्यांचा पाढा वाचला. कॉरीडोर करताना स्थानिकांना विश्वासात न घेतल्याने वाद निर्माण झाल्याचा मुद्दा सचिन अहिर यांनी उपस्थित केला. तसेत कॉरिडॉर सोलापूर आणि पुणे शहराला जोडणार का, असा प्रश्न विचारला. तर मुख्यमंत्र्यांनी पंढरपूरला जाऊन आश्वासन दिल्यानंतर ही आंदोलन सुरुच आहे. (Pandharpur will be developed on the lines of Varanasi) विकासाला प्राधान्य देताना, कोणीही नाराज होणार नाही, अशी हमी द्यावी, अशी मागणी राष्ट्रवादीचे सदस्य शशिकांत शिंदे यांनी केली. विरोधी पक्षनेते अंबादास दानवे यांनी पुरातन वास्तू आणि वाड्यांचा मुद्दा उपस्थित केला. नदीचे प्रदुषण कमी कसे करणार, विमानतळ उभारावे, अशी मागणी ही दानवेंनी केली. मुख्यमंत्र्यांनी यावर उत्तर दिले.

कायमस्वरूपी व्यवस्था करण्यात येणार - पंढरपूर तीर्थक्षेत्र विकास आराखडा हा राज्य आणि देशाच्या दृष्टीने महत्वाकांक्षी प्रकल्प आहे. हा आराखडा सर्वंकष होण्यासाठी वाराणसी आणि तिरुपती या देवस्थानाला सोलापूरचे जिल्हाधिकारी यांच्या पथकाने भेट देऊन पाहणी केली आहे. त्याच धर्तीवर मंदिरात येणाऱ्या वारकरी भाविकांना चांगल्या सुविधा मिळाव्यात, श्रींचे दर्शन सुखकर व्हावे यासाठी मंदिरातील मूळ वास्तूचे व वारकरी सांप्रदायाच्या प्रथा परंपरेचे जतन करून पुरातत्व विभागाच्या मार्गदर्शनानुसार मंदिर व परिसराचा विकास करण्यात येणार आहे. यासाठी वाराणसी आणि तिरुपतीच्या धर्तीवर स्वच्छता, चांगले रस्ते, शौचालये, हॉस्पिटल आणि चंद्रभागा घाट याकडे लक्ष देऊन कायमस्वरूपी व्यवस्था करण्यात येणार असल्याचे मुख्यमंत्री म्हणाले.

न्याय होणार नसल्याची ग्वाही - छोटे व्यापारी, स्थानिक रहिवासी यांच्या शकांचे निरसन करून त्यांना विश्वासात घेऊन सर्वांच्या सहकार्याने योग्य मोबदला देण्यात येणार आहे. शिवाय त्यांचे योग्य पुनर्वसन करण्यात येईल. पंढरपूर तीर्थक्षेत्राचा बहुआयामी व सर्वंकष विकास करण्यासाठी कॉरीडॉरचा नियोजित प्रारूप विकास आराखडा सामान्य जनतेच्या प्रतिक्रिया, आकांक्षा, अपेक्षा जाणून घेण्यासाठी जाहीर करण्यात आला आहे. प्राप्त झालेल्या सर्व हरकती, सूचना यांचा विचार करून कोणावरही अन्याय होणार नसल्याची ग्वाही मुख्यमंत्री शिंदे यांनी दिली.

उदय सामंत यांचे स्पष्टीकरण - तीर्थक्षेत्र आराखड्यामध्ये नदी स्वच्छता, घनकचरा व्यवस्थापन, पार्कींग, पाणी आदी पायाभूत सुविधेची कामे प्राधान्याने करण्यात येणार आहेत. ही कामे करताना वारकरी परंपरेला व संस्कृतीला धक्का पोहोचणार नाही याची काळजी घेतली जाईल. होळकरवाडा, शिंदेवाडा याबाबत पुरातत्व विभागाच्या सुचनांनुसार जतन करून कॉरीडॉर केला जाईल, असे उद्योग मंत्री उदय सामंत यांनी सांगितले. तसेच पुढील 25 वर्षानंतर होणारी गर्दी व वाहतूक व्यवस्था विचारात घेऊन तीर्थक्षेत्र विकासाचा प्रारुप आराखडा करण्यात आला आहे. 964 सूचना/हरकती प्राप्त झाल्या असून यात 366 सूचना रस्ता रुंदीकरण व मोबदला याबाबत आहेत, असेही सामंत म्हणाले.