देशाला नक्षल्यांचे ग्रहण, १० वर्षात शेकडो जवानांना वीरमरण

कोलकत्याहून मुंबईला येणाऱ्या त्रिवेणी एक्सप्रेसमध्ये २०१० ला स्फोट घडवण्यात आला होता. यात १५० जण मृत्यूमुखी पडले होते.

मुंबई - नक्षलवादी आणि भारतीय निमलष्कर दल किंवा पोलीस यांच्यातील संघर्ष नेहमीच बघायला मिळतो. नक्षलवाद्यांच्या हिंसेत अनेक सैनिक आणि पोलिसांना हौतात्म्य आले आहे. आज गडचिरोली येथे नक्षलवाद्यांनी आयईडी बॉम्बस्फोट घडवून आणला आहे. नजर टाकूया नक्षलवाद्यांनी केलेल्या मागील दहा वर्षातील महत्वाच्या हल्ल्यांवर

छत्तीसगड २००७ - नक्षलवाद्यांनी पोलिसांच्या छावणीवर रानी बोडी या गावात हल्ला केला होता. यात ५५ पोलिसांना आपला जीव गमवावा लागला. छत्तीसगड राज्य पोलीस आणि विशेष पोलीस अधिकाऱ्यांचा यात समावेश होता.

नयागढ २००८ - नयागढचा नक्षलवादी हल्ला हा भारताच्या इतिहासातील सर्वात मोठ्या हल्ल्यापैकी मानला जातो. यात १४ पोलिसांना हौतात्म्य आले होते.

गडचिरोली २००९ - २७ मार्चला गडचिरोली येथे भूसुरंग फोडून स्फोट घडवण्यात आला होता. यात केंद्रीय राखीव पोलीस दलाचे १५ जवान हुतात्मा झाले होते.

कोलकता मुंबई ट्रेन २०१० - कोलकत्याहून मुंबईला येणाऱ्या त्रिवेणी एक्सप्रेसमध्ये २०१० ला स्फोट घडवण्यात आला होता. यात १५० जण मृत्यूमुखी पडले होते.

महाराष्ट्र आणि छत्तीसगड २०१० - छत्तीसगड आणि महाराष्ट्राच्या सीमेवर ८ ऑक्टोबरला भूसुरुंग पेरण्यात आला. यात ३ पोलीस मृत्यूमुखी पडले.

गरियाबंद २०११ - गरियाबंद येथे १० पोलिसांना नक्षलवाद्यांच्या हल्ल्यात वीरमरण आले. याच ठिकाणी पूल उडवून देण्याचे काम नक्षलवाद्यांनी केले. यात ४ जण मृत्यूमुखी पडले

सुकमा २०१३ - छत्तीसगडच्या सुकमा येथे नक्षलवाद्यांचा हल्ला झाला. यात २७ जणांचा मृत्यू झाला. यात एखा माजी मंत्र्यांचाही समावेश होता.

दंतेवाडा २०१९ - भाजप आमदाराच्या काफिल्यावर नक्षलवाद्यांनी हल्ला केला. यात आमदार भीमा मांडवी यांचा मृत्यू झाला होता.