मुंबई : मुंबईत चर्चगेट परिसरात मुलींच्या वसतिगृहात मुलीचा मृतदेह मंगळवारी आढळला होता. मृताची मैत्रिण असलेल्या वसतिगृहातील तरुणीने पोलिसांना दिलेल्या जबाबात सांगितले की, आरोपी कनोजिया याने चार ते पाच दिवसांपूर्वी मयत मुलीशी जवळीक साधण्याचा प्रयत्न केला होता. हा प्रकार मृत मुलीने सांगितला होता. मृताच्या मैत्रिणीने पोलिसांना सांगितले की, कनोजिया हा मृत तरुणीच्या मजल्यावर जाऊन तिला जवळ घ्यायचा आणि तिच्याशी बोलण्याचा प्रयत्न करायचा.
मृत मुलीचे पोस्टमॉर्टम : झोन १ चे पोलीस उपायुक्त प्रवीण मुंढे यांनी सांगितले की, जे जे रुग्णालयात मृत मुलीचे पोस्टमॉर्टम करण्यात आले आहे. शवविच्छेदनात मिळालेल्या प्राथमिक माहितीनुसार, मुलीचा गळा आवळून खून करण्यात आला असून, उर्वरित शवविच्छेदन अहवाल राखून ठेवण्यात आला आहे. एका पोलीस अधिकाऱ्याने सांगितले की, याप्रकरणी कलम 376 आणि 302 अन्वये गुन्हा दाखल करण्यात आला आहे. या खून प्रकरणात पोलिसांनी 7 ते 8 जणांचे जबाबही नोंदवले आहेत. सोमवारी रात्री 10.30 वाजता मृत तरुणीचे वसतिगृहात राहणाऱ्या मुलीशी बोलणे झाले होते. ही घटना रात्री 11 ते 4.40 च्या दरम्यान घडली असावी, असे पोलिसांचे मत आहे. आरोपी ओमप्रकाश कनोजिया वसतिगृहाच्या गेटवर लावलेल्या सीसीटीव्हीमध्ये तो पहाटे 4.44 वाजता बाहेर पडताना आणि पहाटे 4.58 वाजता तो चर्नी रोड रेल्वे मार्गावर रेल्वे रुळावर झोपत असल्याचे दिसत आहे. लोकल ट्रेन त्याच्यावरून जाताना दिसते.
मुलीचा मृतदेह घेण्यास नकार : मृत मुलीच्या आईने पोलिसांना दिलेल्या जबाबात म्हटले आहे की, कनोजिया आपल्या मुलीजवळ जाण्याचा प्रयत्न करत असल्याचे तिच्या मुलीने फोनवर सांगितले होते. अकोल्याहून आलेल्या मृत मुलीच्या वडिलांनी आपल्या मुलीचा मृतदेह घेण्यास नकार देत आपली मुलगी शासकीय वसतिगृहात राहते, तिच्या सुरक्षेची जबाबदारी वसतिगृहाची आहे, त्यामुळे त्यांच्यावरही कारवाई करावी, असा सवाल उपस्थित केला आहे.
एकटा बघून साधला डाव : मृत तरुणी वसतिगृहाच्या चौथ्या मजल्यावर राहत होती. या वसतिगृहात सुमारे 400 मुली राहू शकतात. एका पोलीस अधिकाऱ्याने सांगितले की, वसतिगृहातील बहुतांश खोल्या रिकाम्या आहेत आणि ज्या मुलींच्या परीक्षा संपल्या आहेत. त्या आपल्या घरी गेल्या आहेत. मयत मुलीची परीक्षाही सोमवारी संपली असून बुधवारी सकाळी ती अकोल्यातील तिच्या घरी जाणार होती आणि तिकीटही काढले होते. वसतिगृहातील बहुतांश खोल्या रिकाम्या होत्या आणि मृत मुलगी ज्या मजल्यावर राहत होती, त्या मजल्यावर ती एकटीच राहिली होती. वसतिगृहाच्या वॉर्डनने मृत मुलीला पहिल्या मजल्यावरील खोलीत येऊन राहण्यास सांगितले होते. परंतु मयत मुलीने दोन दिवसांत परीक्षा संपणार आहे. त्यामुळे ती घरी जाणार असल्याचे सांगितले.
आरोपीची आत्महत्या : आरोपी ओमप्रकाश कनोजिया हा सकाळी वसतिगृहातून पळून गेला होता, त्याचे वडील रामदुलाल कनोजिया (55) यांचे ओमप्रकाश यांच्याशी नेहमी बोलणे होत होते. घटनेदिवशी रामदूलाल यांनी दिवसभरात सुमारे 100 वेळा ओमप्रकाश याला फोन केला. मात्र ओमप्रकाश याने फोन उचलला नाही. खून केल्यानंतर ओमप्रकाशने आपला मोबाईल सुरक्षा रक्षकाच्या खोलीत ठेवला होता. ओमप्रकाश याने आत्महत्या केल्यानंतर चर्चगेट जीआरपीने त्याचा मृतदेह जीटी रुग्णालयात पाठवला. जीआरपी पोलिसांना ओमप्रकाशच्या खिशातून दोन चाव्या सापडल्या. त्यापैकी एक चावी मृताच्या खोलीची होती. मुलीची हत्या केल्यानंतर ओमप्रकाशने तिच्या खोलीला बाहेरून कुलूप लावले होते.
हत्येचा निषेध : या हत्येचा निषेध करण्यासाठी अनेक राजकीय पक्षांच्या लोकांनी मरीन ड्राइव्ह पोलिस स्टेशन गाठले. ऑल इंडिया पँथर पार्टीच्या मुंबई अध्यक्षा सुषमा शिंदे याही पोलीस ठाण्यात पोहोचल्या. महिला वसतिगृहात पुरुष वॉचमन का ठेवले आणि वॉचमनला वरच्या मजल्यावर कोणी जाऊ दिले, असा सवाल शिंदे यांनी केला. वसतिगृहाच्या वॉर्डनवर कारवाई करावी, अशी मागणी त्यांनी केली आहे.
वसतिगृह हत्याकांड प्रकरण : एका पोलीस अधिकाऱ्याने सांगितले की, मृत मुलीचे वडील आणि काही सामाजिक संस्था वसतिगृहाच्या वॉर्डनवर कारवाई करण्याची मागणी करत आहेत. आम्ही त्याची तपासणी करत आहोत. वसतिगृह हत्याकांड प्रकरणी विरोधी पक्षनेते अजित पवार हे मरीन ड्राईव्ह पोलीस ठाण्यात आले. त्यांनीही या हत्येबद्दल खेद व्यक्त केला आणि सांगितले की, जर कोणाला सुरक्षा एजन्सी सुरू करायची असेल तर सरकारने नेहमीच वैध कागदपत्रे, प्रशिक्षित सुरक्षा रक्षक आणि योग्य ते तपासावे. वसतिगृहांना सुरक्षा प्रदान करणारी शासकीय शाखा देखील आहे. तांत्रिकदृष्ट्या 3 शिफ्टमध्ये 12 सुरक्षा दल तैनात करावे लागतील. पण या सर्व घटनेत कोण बेजबाबदार होते, याचा तपास पोलीस करत आहेत. जुलै महिन्याच्या विधानसभेत आम्ही विधानसभेत मागणी करू की, महाराष्ट्रातील सर्व मुलींच्या वसतिगृहांच्या सुरक्षेचे काटेकोरपणे पालन करणे आवश्यक आहे.
हेही वाचा :
- Mumbai Crime News: मरिन ड्राइव्ह येथील मुलींच्या वसतिगृहात बलात्कार करून विद्यार्थिनीची हत्या? संशयित सुरक्षारक्षकाची रेल्वेखाली आत्महत्या
- Beed Crime News: जावयाला दुसरे लग्न करू न दिल्याने सासऱ्याचा खून? मुलाच्या विवाहाच्या तोंडावर केली हत्या
- Nashik Crime News: खळबळजनक! नोकरीचा बहाणा करत अल्पवयीन मुलीची कर्नाटकात विक्री
