मुंबई : बनावट पोलीस अधिकारी हा आरोपी सहाय्यक पोलिसाच्या गणवेशात फिरत होता. त्याच्याजवळ पोलिसांप्रमाणे पल्सर १८० दुचाकी होती. त्यावर पोलीस नावाचे स्टिकर, पोलिसांप्रमाणे हॅल्मेट व पोलिसांप्रमाणे बनावट ओळखपत्र देखील आढळून आले आहे. त्यामुळे त्याच्यावर फार कुणाला संशय येत नसे. तसेच छोट्या मोठ्या दुकानात जाऊन हा आरोपी किरकोळ साहित्य कारवाईच्या नावावर दुकानदारांकडून फुकट घेऊन जात होता.
बनावट पोलीस अधिकाऱ्याला अटक : दरम्यान अंधेरी एमआयडीसी परिसरात हा तोतया अधिकारी सिगारेटचा बाॅक्स मूळ किंमतीपेक्षा जास्त किंमतीला विकत असल्याने त्याच्यावर पोलिसांना संशय आला. अधिक चौकशीत तो तोतया असून मागील अनेक वर्षापासून अशा प्रकारे फसवणूक करत असल्याने पोलिसांनी त्याच्यावर गुन्हा दाखल करत त्याला अटक केली आहे. मुंबईतील साकीनाका पोलिसांनी एका बनावट पोलीस अधिकाऱ्याला अटक केली आहे. पान दुकानांवर विदेशी सिगारेट ठेवण्याचे आणि त्यांच्यावर कारवाई करण्याच्या बहाण्याने तो मोठ्या प्रमाणावर होर्डिंग करायचा.
विदेशी सिगारेटची पाकिटे जप्त : कैलास खामकर असे आरोपीचे नाव आहे. त्याच्याकडून पोलिसांचे ओळखपत्र आणि विदेशी सिगारेटची अनेक पाकिटे जप्त करण्यात आली आहेत. मुंबई पोलिसांचे डीसीपी महेश्वर रेड्डी यांनी सांगितले की, वाहतूक पोलिस अधिकाऱ्यांना त्याच्यावर संशय होता. त्या आधारे चौकशी केली असता तो पोलीस अधिकारी नसल्याचे समोर आले. हा बनावट पोलिस अधिकारी साकीनाका हद्दीतील एका पान दुकानदाराची शिकार करण्याचा प्रयत्न करत होता. यादरम्यान तेथून जाणाऱ्या एका वाहतूक पोलिसाला त्याचा संशय आला.
पान दुकानांना टार्गेट : त्याआधारे त्याची चौकशी केली असता तो बनावट पोलीस असल्याचे उघड झाले. आरोपीकडून मुंबईतील एका पोलीस ठाण्याचा बनावट पोलीस ओळखपत्र जप्त करण्यात आले आहे. याचा वापर तो पान दुकानदारांना धमकावून पैसे उकळण्यासाठी करायचा. अनेक दिवसांपासून आरोपीने अशा पान दुकानांना टार्गेट करून त्या दुकानात सिगारेट ठेवण्याच्या बहाण्याने पैसे उकळले. सध्या पोलिसांनी त्याला वाहनासह ताब्यात घेतले आहे. पुढील तपास सुरू आहे.
पोलिसांच्या मनात शंका : खरे तर बनावट पोलिसाने खाकी वर्दी परिधान केली होती. पण त्याची पेहरावाची पद्धत, गळ्यात रुमाल आणि पान खाल्ल्यानंतर बोलण्याची पद्धत यामुळे खऱ्या पोलिसांच्या मनात शंका निर्माण झाली. पांढऱ्या रंगाच्या ट्रॅफिक पोलिसांच्या दुचाकीवरून खाकी वर्दी घातलेला माणूस का फिरत होता? असा संशय या भागात गस्त घालणाऱ्या खऱ्या पोलिसांना पडला. गमतीची गोष्ट म्हणजे कैलास खामकर या बनावट पोलिसाने खाकी वर्दी घातली होती, पण त्याच्या खांद्यावर किती तारे आहेत हे त्याला माहीत नव्हते.
