मुंबई - आपल्या दैनंदिन गरजेच्या वस्तू आपल्याला घरपोच मिळाव्यात अशी आपली इच्छा असते. ही गरज ओळखून मुंबईच्या सागर यरनाळकर या तरुणाने एका अॅपची निर्मीती केली आहे. ज्या अॅपच्या माध्यमातून रोज लागणाऱ्या वस्तू आपल्या घरापर्यंत येऊ शकतात. या अॅपचे नाव आहे, डेली निन्जा अॅप. विशेष म्हणजे या शोधासाठी सागरची दखल थेट फोर्ब्सने घेतली आहे.
रोजच्या धकाधकीच्या आयुष्यात घरगुती सामान, किराणा माल, भाजीपाला आणण्यासाठी बाजारात जाणे अवघड असते. बाहेर जाण्यासाठी अतिरिक्त वेळ काढावा लागतो. तसेच, ज्येष्ठ नागरिकांसाठी तर ही गोष्ट थकवणारी असते. अशा परिस्थितीत दैनंदिन गरजेच्या वस्तू घरपोच मिळाव्यात अशी आपली अपेक्षा असते. हीच अपेक्षा ओळखून सागर यरनाळकर याने या अॅपची निर्मीती केली आहे. हे अॅप्लीकेशन घेतले तर तुमचा दुधवाला तुम्हाला सामान घरपोच आणून देऊ शकतो.
काय आहे डेली निन्जा अॅप
मूळचा ठाण्याच असणारा सागर यरनाळकर याने हे अॅप बनविले आहे. या अॅप्लिकेशनच्या मदतीने त्यानं दूधवाल्यांचे नेटवर्क तयार केले आहे. दूधवाल्यांचे नेटवर्क वापरून त्याने घरपोच किराणा, फळे आणि भाजीपाला मिळेल अशी सुविधा उपलब्ध करून दिली आहे. डेलि निंजा हे अॅप सध्या मुंबई, पुणे, बंगळुरु, मैसूर, चेन्नई आणि हैद्राबाद या सहा शहरांमध्ये सुरू आहे. या सहा शहरांमध्ये २ हजार ४०० दुधवाले कार्यरत आहेत. या सहा शहरांमधील दुधवाल्यांचं नेटवर्क सांभाळण्यासाठी ४०० हून अधिक जणांची टीम काम करते. जवळपास ७० हजार घरांमध्ये डेलि निंजाद्वारे सामान पोहोचवण्याचे काम होत आहे.
सागर आणि त्याचा मित्र अनुराग गुप्ता यांनी एकत्र येत हा व्यवसाय सुरू केला. सागर आणि अनुराग हे दोघे या व्यवसायात पार्टनर आहेत. सागरने इंजिनयरिंगची पदवी घेतली आहे. पण इंजिनयरिंगची नोकरी न करता त्याने स्वत:चा व्यवसाय सुरू केला. नुकतंच प्रसिद्ध झालेल्या फोर्ब्सच्या यादीत त्याच्या नावाची दखल घेण्यात आली आहे.
'डेली निंजा' कसं काम करतं?
सुरुवातीला तुम्हाला डेलि निंजा हे अॅप डाऊनलोड करायचे आहे. या अॅपच्या मदतीने तुम्हाला दुसऱ्या दिवशीसाठी लागणारा किराणा, भाजी-फळे ऑर्डर करायची आहेत. तुम्ही अगदी रात्री ११ वाजेपर्यंत देखील या अॅपच्या मदतीने दुसऱ्या दिवशी लागणारे घरगुती सामान मागवू शकता. तुम्ही दिलेली ऑर्डर दुसऱ्या दिवशी सकाळी दुधवाल्याच्या माध्यमातून तुमच्यापर्यंत पोहोचवण्यात येईल. अंदाजे सकाळी ७ वाजेपर्यंत ऑर्डर केलेले सर्व सामान तुम्हाला मिळेल. ज्याप्रमाणे तुम्ही महिन्याला किराणावाल्याचे बिल चुकते करता तसंच तुम्हाला इथं करायचे आहे.
कशी सुचली संकल्पना
अनुराग आणि सागर हे दोघे जॉबसाठी बंगळुरुला राहत होते. त्यांच्यासोबत आणखी दोन रुम पार्टनर्स राहत होते. त्यांच्यातल्याच एकामुळे त्यांना ही संकल्पना सुचली. ते राहणाऱ्या अपार्टमेंटमधल्या दुधवाल्याशी त्याच्या मित्राची चांगली ओळख झाली होती. रोज रात्री तो त्याला व्हॉट्स अॅप करायचा. व्हॉट्स अॅप करून दुसऱ्या दिवशी आवश्यक सामान, जसे की अंडी, ब्रेड आणायला सांगायचा. दुधवाला सकाळी ७ वाजता अपार्टमेंटमधल्या घरांमध्ये दुध पोहोचवायचा. त्याचवेळी तो सागरच्या रुम पार्टनरने मागवलेले सामान देखील पोहोचवायचा. त्यातूनच सागर आणि अनुरागला ही संकल्पना सुचली.
फोर्ब्सकडून सन्मान
फोर्ब्सच्या यादीत नावे येणे हे जगभरातील लोकांसाठी अतिशय मानाची बाब आहे. सागरची देखील फोर्ब्सच्या यादीत दखल घेण्यात आली आहे. अंडर ३० या फोर्ब्सच्या यादीत सागर झळकला आहे. संकल्पना आवडल्याचं फोर्ब्सकडून फोनवरून सागरला कळवण्यात आले. जवळपास ४० ते ५० स्पर्धकांमधून सागर आणि त्याच्या टिमची निवड करण्यात आली.
