नवी मुंबई - बाळाचे मस्तक धडावेगळे करून आईने स्वतः आत्महत्या केल्याची घटना नवी मुंबईतील वाशी पूल परिसरात घडली आहे. याप्रकरणी मृत मातेवर वाशी पोलीस ठाण्यात गुन्हा नोंद झाला आहे. या महिलेने स्वतःच्या 1 वर्षीय बाळाची हत्या केल्यानंतर त्याच्या देहाचे तुकडे बॅगमध्ये भरले व बॅगसह धावत्या लोकल ट्रेनमधून उडी मारून आत्महत्या केली. ही घटना ४ फेब्रुवारी रोजी रात्री उशीरा घडली.
महिलेचे मानसिक संतुलन बिघडले होते -
ही महिला चेंबूर येथे रहिवासी असून तिचा पती सिव्हील इंजिनियर आहे. वर्षभरापूर्वी या महिलेने एका मुलाला जन्म दिला होता. तेंव्हापासून ती तिच्या माहेरी पुण्यातील हडपसर येथे राहत होती. 6 फेब्रुवारीला तिच्या मुलाचा वाढदिवस होता. त्यामुळे वाढदिवसासाठी लागणारे साहित्य आणण्यासाठी या महिलेची आई बाजारात गेली होती. हीच संधी साधून कोणालाही न सांगता मृत महिला आपल्या मुलाला घेऊन मुंबईला निघाली. दरम्यान, मृत महिलेचे मानसिक संतुलन बिघडले असल्याने तिने बाळाची हत्या केली असल्याची माहिती जीआरपीचे वरिष्ठ पोलीस निरीक्षक विष्णू केसरकर यांनी दिली आहे.
रात्री 10 वाजता वाशी पुलावरून मारली उडी -
पनवेलहून मुंबईकडे जाणारी लोकल ट्रेन पकडून वाशी खाडीपूल येताच महिलेने हातातील बॅगसह पाण्यात उडी मारली. संबंधित महिला मनोरुग्ण असल्याची माहिती मिळाली आहे. शिवाय त्या बॅगेत मुलाचे मस्तक व धड वेगळे केले होते.
हेही वाचा - टिकैत यांचा केंद्राला अल्टीमेटम; महात्मा गांधींच्या जयंतीपर्यंत आंदोलन सुरूच राहणार
