मुंबई MLA Disqualification Hearing: सर्वोच्च न्यायालयाच्या निर्देशानुसार एका आठवड्यात आमदारांच्या आपात्रतेबाबतचा निपटारा करण्याबाबत प्रोग्राम तयार करण्यास सांगितले आहे. त्यानुसार विधानसभा अध्यक्ष राहुल नार्वेकर यांनी नव्याने शिवसेनेच्या 54 आमदारांना नोटीस बजावल्या असून सोमवारी दुपारी 3 वाजता सुनावणीसाठी हजर राहण्यास सांगितलं आहे. अपात्रतेबाबत सर्व याचिका एकत्र करून नोटीस बजावण्यात आल्याची माहिती समोर येत आहे.
तर गटप्रमुखांना बोलवणार: विधानसभा अध्यक्ष राहुल नार्वेकर यांनी माध्यमांना प्रतिक्रिया देताना म्हटले की, शिवसेनेच्या दोन्ही गटांना कागदपत्रं एकमेकांना देण्यासाठी वेळ देण्यात आला. त्यानुसार पुढील आठवड्यात नवीन सुनावणी होण्याबाबत संकेत दिले होते. सर्वोच्च न्यायालयाचे निर्देश आणि विधिमंडळाच्या कायद्याचा नियमाप्रमाणं दिरंगाई केली जाणार नाही. योग्य निर्णय घेतला जाईल. त्यासोबत घाईत निर्णय घेणार नसल्याचेही सांगायला विसरले नाही. नार्वेकर पुढे म्हणाले की, गरज पडल्यास शिवसेनेच्या दोन्ही गटांचे म्हणजे शिंदे गटाचे प्रमुख मुख्यमंत्री एकनाथ शिंदे आणि ठाकरे गटाचे प्रमुख उद्धव ठाकरे यांना सुनावणीसाठी बोलवले जाऊ शकते. सोमवारी शिवसेनेच्या दोन्ही गटाच्या 54 आमदारांना सुनावणीबाबतचे वेळापत्रक दिलं जाण्याची शक्यता आहे. वेळापत्रकानुसार दोन्ही गटांच्या आमदारांना सुनावणीला सामोरे जावे लागेल.
नार्वेकरांनी केला दिल्ली दौरा: शुक्रवारी नार्वेकरांनी विधानभवनातील विधी विभाग आणि वकिलांशी चर्चा केली होती. त्यानंतर अचानक दुपारी विधानसभा अध्यक्ष राहुल नार्वेकर हे दिल्लीला गेले. दिल्लीत त्यांनी कायदेतज्ज्ञांच्या भेटीगाठी घेतल्याची माहिती मिळत आहे. तर दुसरीकडे ठाकरे गटाचे आमदार आणि विधानपरिषद विरोधीपक्ष नेते अंबादास दानवे यांनी नार्वेकर भाजपाचे नेते असल्याने ते राजकीय हेतुनं काम करत असल्याचा आरोप केला आहे. नार्वेकर सर्वोच्च न्यायालयापेक्षा मोठे नसल्याचेही सांगायला अंबादास दानवे विसरले नाहीत.
महायुती सरकारचे भविष्य ठरेल: विधानसभा अध्यक्ष राहुल नार्वेकर सोमवारी आमदारांच्या अपात्रतेबाबत सुनावणी घेण्यास सुरुवात करणार आहेत. यावेळी राज्यासह देशातील सर्वांचे लक्ष त्यांच्याकडे असणार आहे. आगामी काळात महायुती सरकारचे भवितव्य काय असेल याचं उत्तर लवकरच मिळेल, अशी अपेक्षा सगळीकडे व्यक्त केली जात आहे.
हेही वाचा:
