मुंबई - अमेझॉन आणि फ्लिपकार्ट कंपनीने त्यांच्या ई-कॉमर्स संकेतस्थळावर मराठी भाषेचा समावेश करण्यासाठी सकारात्मकता दर्शवली आहे. महाराष्ट्र नवनिर्माण सेनेने ई-कॉमर्स कंपन्यांच्या ऑनलाइन शॉपिंग अ‌ॅपमध्ये मराठी भाषेचा समावेश करण्याची मागणी केली होती. याबाबत सात दिवसानंतर खळ्ळ-खट्ट्याक आंदोलनाचा इशारा दिला होता. त्यानंतर या कंपन्यांकडून यासंदर्भात सकारात्मकता दाखवली आहे. अमेझॉनचे शिष्टमंडळ आज मुंबईत मनसे नेत्यांची भेट घेत आहे.
अमेझॉन आणि फ्लिपकार्टच्या ई-कॉमर्स संकेतस्थळावर, अनुप्रयोगांवर (अ‌ॅप) मराठी भाषेचा समावेश करण्यासाठी मनसे आक्रमक झाली होती. अमेझॉन आणि फ्लिपकार्ट या दोन्ही संस्थांना सात दिवसांची वेळ मनसेने दिली होती. मराठीच्या मागणीनंतर जवळपास २ कोटी प्रॉडक्टची 'मेगा चैन' तयार करण्याचे दोन्ही कंपन्यांपुढे आव्हान आहे. पण, यासंदर्भात स्व:त अ‌मेझाॅनचे संस्थापक जेफ बेझोज यांनी मनसेने केलेल्या मराठी भाषेचा मागणीच्या मेलची दखल घेत लवकर आम्ही यावर काम करत मराठी उपलब्ध करून देऊ, असे म्हटले आहे.
हेही वाचा - आता तरी राज्यातील मंदिरे उघडा; अखिल भारतीय वारकरी मंडळाची मागणी
मराठी भाषा लागू करण्यासाठी २० दिवस लागणार, अशी माहिती दोन्ही कंपन्यांनी दिली आहे. यावर सातपर्यंत संकेतस्थळावरील इतर भाषा महाराष्ट्रात ब्लाॅक करा अशी मनसेची मागणी मनसेने केली आहे. याच संदर्भात मनसे नेते अखिल चित्रे आज बिकेसी येथे अमेझॉन शिष्टमंडळाची भेट घेणार आहेत.
