मुंबई - गेल्या तीन महिन्यांपासून कोतवालांच्या विविध संघटनांचे कामबंद आंदोलन सुरू होते. हे आंदोलन आज मागे घेण्यात आले आहे. कोतवालांच्या विविध मागण्यांवर योग्य निर्णय घेतला जाईल, असे आश्वासन महसूलमंत्री चंद्रकांत पाटील यांनी दिले आहे.
कोतवालांच्या मानधनामध्ये भरीव वाढ, कोतवाल संघटनेस मान्यता, कोतवाल संवर्गातून तलाठी संवर्गात पदोन्नती करिता विशिष्ट कोटा निश्चित करणे, महिलांना सहा महिने प्रसूती रजा या मागण्यांसाठी कोतवाल संघटना आंदोलन करत होत्या. कोतवालांच्या मागण्यांवर तोडगा काढण्यासाठी महसूलमंत्री पाटील यांनी आज राज्यातील विविध संघटनांच्या पदाधिकाऱ्यांची बैठक मंत्रालयातील दालनात बोलावली होती. या बैठकीला राज्यातील विविध कोतवाल संघटनांचे पदाधिकारी उपस्थित होते.
या बैठकीत कोतवालांच्या मागण्यांवर सविस्तर चर्चा झाली. कोतवालांच्या मागण्यांसदर्भात शासन सकारात्मक असून, मागण्यांवर योग्य निर्णय घेण्यात येईल असे यावेळी पाटील म्हणाले. यावर संघटनेच्या पदाधिकाऱ्यांनी समाधान व्यक्त केले आहे.
