मुंबई: १ जानेवारी ते २० मार्च २०२३ या कालावधीत इन्फल्युएंझाची लक्षणे असलेले ३,११,१९३ संशयित रुग्ण आढळून आले आहेत. त्यापैकी १७७७ रुग्णांना ऑसेलटॅमीवीर देण्यात आले. आतापर्यंत एच १ एन १ चे ४१७ तर एच ३ एन २ चे २४९ रुग्ण आढळून आले आहेत. त्यातील १६० रुग्ण रुग्णालयात भरती आहेत. राज्यात एच १ एन १ या व्हेरियंटने ३ मृत्यू झाले आहेत. तर एच ३ एन २ या व्हेरियंटमुळे अहमदनगर येथे एका रुग्णाचा मृत्यू झाला आहे. वाशीम, पुणे आणि पुण्याच्या खडकी कॅन्टोन्मेंट येथील ३ संशयित मृत्यूंची नोंद झाली असून डेथ ऑडिट कमिटीच्या अहवालानंतर या ३ मृत्यूचे कारण समोर येणार आहे.
३ संशयित मृत्यूची नोंद: आज राज्यात इन्फ्लुएंझाच्या एच १ एन १ चे १० तर एच ३ एन २ चे ३२ नवे रुग्ण आढळून आले. त्यामुळे राज्यातील एच १ एन १ च्या रुग्णांचा आकडा ४१७ वर तर एच ३ एन २ च्या रुग्णांचा आकडा २४९ वर पोहचला आहे. राज्यात इन्फल्युएंझाचे एकूण ६६६ रुग्णांची नोंद झाले आहेत. एच ३ एन २ व्हेरियंटमुळे १ मृत्यू झाला असून ३ संशयित मृत्यूची नोंद झाली आहे.
कोरोनाचे २८० नवे रुग्ण : राज्यात गेले तीन वर्षे कोरोना विषाणूचा प्रसार आहे. आज राज्यात कोरोनाच्या २८० नवीन रुग्णांची नोंद झाली आहे. एका रुग्णाचा मृत्यू झाला आहे, १५४ रुग्ण बरे झाले आहेत. सध्या १४८९ ऍक्टिव्ह रुग्ण आहेत. राज्यात गेल्या तीन वर्षात एकूण ८१ लाख ४० हजार १४५ रुग्णांची नोंद झाली आहे. त्यापैकी ७९ लाख ९० हजार २२७ रुग्ण बरे झाले असून १ लाख ४८ हजार ४२९ रुग्णांचा मृत्यू झाला आहे.
मुंबईमध्ये ६१ नवे रुग्ण : मुंबईमध्ये आज ६१ नव्या रुग्णांची नोंद झाली आहे. आज ३६ रुग्ण बरे झाले आहेत. आज एकाही रुग्णाचा मृत्यू झालेला नाही. मुंबईत सध्या ३२१ ऍक्टिव्ह रुग्ण आहेत. २६ रुग्ण हॉस्पिटलमध्ये दाखल असून त्यापैकी ८ रुग्ण ऑक्सिजनवर आहेत. गेल्या तीन वर्षात कोरोनाच्या ११ लाख ५५ हजार ९२२ रुग्णांची नोंद झाली आहे. तसेच १९ हजार ७४७ रुग्णांचा मृत्यू झाला आहे.
