मुंबई - भारताच्या पश्चिम-किनारपट्टीजवळ असलेल्या अरबी समुद्रात एक चक्रीवादळ तयार होण्याचा अंदाज हवामान तज्ज्ञांनी व्यक्त केला आहे. ११ व १२ जून दरम्यान हे चक्रीवादळ राज्याच्या किनारपट्टीपासून सुमारे ३०० किलोमीटर दूर राहील. त्यामुळे मच्छिमारांनी समुद्रात जाऊ नये, असा सल्ला हवामान खात्याने दिला.
हे चक्रीवादळ राज्यात धडकण्याची शक्यता नाही, परंतु त्याच्या प्रभावामुळे या भागातील किनारपट्टीवर वाऱ्याचा वेग वाढणार आहे. चक्रीवादळाच्या जवळ असलेला समुद्र अधिक खवळलेला राहील, तर किनारपट्टीजवळ समुद्र काही प्रमाणात खवळलेला दिसेल. या दरम्यान कोकणासह मुंबईमध्ये पावसाच्या सरी कोसळण्याची शक्यता आहे, असा अंदाज हवामान तज्ज्ञांनी व्यक्त केला आहे. सुरक्षितेसाठी मच्छिमारांनी ११ व १२ जूनला अरबी समुद्रात जाणे टाळावे, असे आवाहन करण्यात आले आहे.
