मुंबई - 18 ते 44 वयोगटातील नागरिकांचे मोफत लसीकरण केंद्र सरकार करणार असल्याची घोषणा पंतप्रधान नरेंद्र मोदी यांनी केली आहे. केंद्र सरकारच्या या निर्णयाचे स्वागत राज्याच्या आरोग्यमंत्री राजेश टोपे यांच्याकडून करण्यात आले. मात्र, लसीकरण करण्यासाठी राज्याला योग्य लस पुरवठा उपलब्ध व्हावा, अशी अपेक्षाही आरोग्य मंत्र्यांनी बोलून दाखवली आहे.
जुलै-ऑगस्ट महिन्यामध्ये लस होणार उपलब्ध
कोविशिल्ड आणि को-वॅक्सीन लस निर्मिती करणाऱ्या कंपन्यांच्या सीईओ सोबत चर्चा सुरू असून जुलै, ऑगस्ट महिन्यात मोठ्या प्रमाणात लस उपलब्ध होईल, अशी आशा आहे. तसेच स्पुतनिक व्ही लस निर्मिती करणाऱ्या कंपनी सोबतही चर्चा सुरू असून त्याच वेळेदरम्यान स्पुतनिक व्ही लसही उपलब्ध होईल, अशी आशा आरोग्य मंत्र्यांनी व्यक्त केली आहे. दिवसाला दहा लाख नागरिकांचे लसीकरण करण्याची क्षमता राज्य सरकारची असल्याचे देखील यावेळी आरोग्यमंत्र्यांनी सांगितले.
नियम शिथील केले असले तरी, ते पाळणे महत्त्वाचे
राज्यात कोरोनाग्रस्तांची संख्या सात लाखांच्यावर गेली होती. मात्र, आता हीच रुग्ण संख्या जवळपास एक लाख 74 हजारावर आलेली आहे. तर कोरोना रुग्णांच्या रिकवरी रेट हा 95 टक्के एवढा झाला आहे. तर राज्यात दोन कोटी 44 लाख नागरिकांचे लसीकरण झाले असल्याचे आरोग्य मंत्री राजेश टोपे यांच्याकडून सांगण्यात आले. कोरोना रुग्णांची संख्या आता आटोक्यात आली आहे. मात्र, तरीदेखील सर्व नागरिकांनी कोरोनाचे नियम काटेकोरपणे पाळले गेले पाहिजेत, असे आवाहनही आरोग्य मंत्र्यांकडून करण्यात आले आहे.
