मुंबई - लोकसभा निवडणूक - 2019 मतमोजणीच्या अनुशंगाने भारत निवडणूक आयोगाच्या अधिकाऱ्यांनी शुक्रवारी राज्यातील जिल्हाधिकारी आणि निवडणूक निर्णय अधिकाऱ्यांना मतमोजणीबाबत मार्गदर्शन केले. राज्याच्या मुख्य निवडणूक अधिकारी कार्यालयाच्यावतीने या कार्यक्रमाचे आयोजन करण्यात आले होते.
लोकसभा निवडणुकीची मतमोजणी 23 रोजी होणार आहे. या मतमोजणीच्या अनुशंगाने घ्यावयाची काळजी, मतमोजणीची कार्यपद्धती, मतमोजणीच्या अनुशंगाने भारत निवडणूक आयोगाने वेळोवेळी दिलेले निर्देश आदींबाबत यावेळी माहिती देण्यात आली.
मतमोजणीच्या अनुशंगाने इलेक्ट्रॉनिक मतदान यंत्रावर निकाल प्रदर्शित करणे, व्हीव्हीपॅटमधील मतदान चिठ्ठयांची मोजणी याबाबत अभिरूप मतमोजणीचे (मॉक काऊंटिंग) प्रत्यक्ष प्रशिक्षण (हॅण्ड्स ऑन ट्रेनिंग) जिल्हाधिकारी आणि निवडणूक निर्णय अधिकाऱ्यांना देण्यात आले. हे अधिकारी नंतर त्यांच्या अधिपत्याखालील मतमोजणी प्रक्रियेतील अधिकारी, कर्मचाऱ्यांना मतमोजणीबाबतचे प्रशिक्षण देणार आहेत.
गोरेगाव येथे मुंबई उत्तर मध्य लोकसभा मतदारसंघाअंतर्गत स्थापन करण्यात आलेल्या आदर्श मतमोजणी केंद्राला निवडणूक आयोगाचे अधिकारी तसेच राज्यातील जिल्हाधिकारी आणि निवडणूक निर्णय अधिकाऱ्यांनी शुक्रवारी भेट दिली. यावेळी राज्याचे मुख्य निवडणूक अधिकारी अश्वनी कुमार, अतिरिक्त मुख्य निवडणूक अधिकारी दिलीप शिंदे, पुणे विभागीय आयुक्त दीपक म्हैसेकर, भारत निवडणूक आयोगाचे संचालक निखील कुमार, व्ही. एन. शुक्ला, मुंबई उपनगरचे जिल्हाधिकारी सचिन कुर्वे, भारत निवडणूक आयोगाचे अवर सचिव मधुसूदन गुप्ता आदी उपस्थित होते.
