मुंबई - हिंगणघाट जळीतकांडातील पीडितेच्या कुटुंबीयांना शासनाच्या माध्यमातून शक्य ती सर्व मदत करण्यात येईल, असे आश्वासन गृहमंत्री अनिल देशमुख यांनी दिले आहे. पीडितेच्या मृत्यूनंतर आरोपीला कठोर शिक्षा मिळावी. शासनाकडून यासंदर्भात लेखी आश्वासन जोपर्यंत मिळत नाही तोपर्यंत आम्ही तिचा मृतदेह स्वीकारणार नाही, अशी भूमिका पीडितेच्या कुटुंबीयांनी घेतली. यावर गृहमंत्री देशमुख यांनी ही प्रतिक्रिया दिली. ते मुंबई येथे पत्रकारांशी बोलत होते.
वर्धा जिल्ह्यातील हिंगणघाट येथील नांदोरी चौकात सोमवारी (३ फेब्रुवारी) प्राध्यापिकेला पेट्रोल टाकून जाळण्यात आले होते. यामध्ये ती ४० टक्के भाजली होती. तसेच तिचा चेहरा, श्वसननलिका पूर्णपणे जळाली होती. तिच्यावर नागपुरातील ऑरेंज सिटी रुग्णालयात उपचार सुरू होते. मात्र, अखेर आज आठव्या दिवशी सोमवारीच तिची मृत्यूशी झुंज संपली.
हेही वाचा - हिंगणघाट जळीतकांड : 'जीवनाच्या लढाईत तू हरलीस तरी न्यायाच्या लढाईत महाराष्ट्र तुझ्यासोबत'
गृहमंत्री पुढे म्हणाले, पीडित तरुणीला वाचवण्यासाठी आम्ही सर्वतोपरी शक्य ते सर्व प्रयत्न केले. नागपूर येथील तसेच मुंबईहून विशेष डॉक्टरांनी तिच्यावर उपचार केले. मी आजच पीडितेच्या कुटुंबीयांसोबत बोललो आहे. राज्य शासन तुमच्या पाठीशी. पीडित तरुणीच्या भावाला नोकरी आणि शासनाच्या माध्यमातून मदत करण्यात येईल, असे त्यांना सांगितले असल्याचेही गृहमंत्र्यांनी सांगितले. तसेच विशेष सरकारी वकील उज्वल निकम यांच्या सुद्धा संपर्कात आहोत. निकमसुद्धा तेथील जिल्हाधिकारी, पोलीस अधीक्षक आदींच्या संपर्कात आहेत. लवकरात लवकर हा खटला जलदगती न्यायालयात कसा चालवावा, यासाठी त्यांनीही तयारी सुरू केली आहे.
